Սամաթիոյ Անարատ Յղութիւն Եկեղեցւոյ մէջ Սուրբ և Անմահ Պատարագ և այցելութիւն Շիշլիի Ազգային Գերեզմանոց
Վատիկան Նիուզ - Հայկական բաժանմունք
Երեքշաբթի 7 Յունուար 2025–ին, Աստուածայայտնութեան և Մկրտութեան տօներուն յաջորդող Մեռելոց օրը, Տանն Կիլիկիոյ Կաթողիկէ Հայոց Ամենապատիւ և Գերեջանիկ Տէր Ռաֆայէլ Պետրոս ԻԱ. Կաթողիկոս Պատրիարքը, Պոլսոյ Հ. Կ. Աւագ Թեմի Պատրիարքական Կառավաիչ՝ Գերապայծառ Հ. Վարդան Թ.Ծ.Վ. Գազանճեանը, վաստակաւոր առաջնորդ` Արհի. Հ. Լեւոն Արք. Զէքիանը, հոգեւորական դասը և թաղականները այցելութիւն տուին Պոլսոյ Շիշլի թաղամասի Հայոց գերեզմանոցը, ուր պաշտօնական ընդունելութիւն տեղի ունեցաւ պատուոյ հիւերուն, Հոգեշնորհ Հ. Յարութիւն Վրդ. Տամատեանի և տեղւոյն հոգաբարձութեան կողմէ:
Արդարեւ, Մեռելոց օրը սկսանք Ս. Պատարագով՝ Սամաթիոյ Անարատ Յղացեալ Եկեղեցւոյ մէջ, զոր մատոյց Ամենապատիւ և Գերեջանիկ Հոգեւոր Տէրը Երանելի Տէր Կոմիտաս Քհն. Քէոմիւրճեանի խորանին վրայ, ի ներկայութեան Գերապայծառ Հ. Վարդան Թ.Ծ.Վ. Գազանճեանի, Արհի. Հ. Լեւոն Արք. Զէքիանի, հոգեւորական դասուն, տեղւոյն թաղականներուն և հաւատացեալ ժողովուրդին: Այս առթիւ աղօթելով որ Աստուած ընդունելի ընէ նահատակ կղերականին սրբութեան պսակումը: Այնուհետեւ, Ամենապատիւ և Գերեջանիկ Հոգեւոր Տէրը, հոգեւորականները եւ ժողովուրդը թափօրով և շարականներու երգեցողութեամբ ուղղուեցան դէպի Պատրիարքներու դամբարանը, ուր Հոգեհանգստեան պաշտօն կատարուեցաւ:
Այս առթիւ, Ամենապատիւ Հոգեւոր Տիրոջ սրտի խօսք ուղղեց Հոգեշնորհ Հ. Յարութիւն Վրդ. Տամատեանը. «Թոյլ տուէք որ նախ և առաջ եղբայրական ողջոյնները փոխանցելու Պոլսոյ Հայ Առաքելական Թեմի Պատրիարք՝ Ամենապատիւ Սահակ Բ. Արք. Մաշալեանի: Մեզի համար իսկապէ՛ս յատկանշական օրեր էին Ձեր Հովուապետական այցելութիւնը, որով Հ. Կ. Համայնքը ուրախութիւնը ունեցաւ իր Հոգեւոր Պետին ներկայութիւնը վայելելու պատմական Պոլիս քաղաքին մէջ և այս մէկը յատկանշական արարողութեան մը զուգադիպեցաւ, որով մեր Եկեղեցիին համար՝ մեր շատ սիրելի Հ. Վարդան Ծ. Վարդապետը, Դուք նշանակեցիք որպէս Պատրիարքական Կառավարիչ: 2025-ի Ձեր Հայրապետական այցելութեան ծիրէն ներս՝ դուք փափաք ունեցաք նաեւ այցելել Պոլսոյ երբեմնի վախճանեալ Պատրիարքներուն դամբարանը և ձեր յարգանքի տուրքը մատուցանելու անոնց՝ սուրբ Ծննդեան ուրախութեան առընթեր, Հ. Վարդանի ուրախութեան առընթեր, մեր ժողովուրդին ուրախութեան առընթեր: Այս այցը պատմութեան մէջ առաջին անգամ տեղի կ'ունենայ համայն հայութեան համար կարեւոր և նշանակալից կեդրոնի մը, ուր կը ննջեն մեծանուն հոգեւորականներ. ինչպէս Մաղաքիա Արք. Օրմանեանը, որ Հ. Կ. Եկեղեցւոյ ծոցէն ելած՝ սակայն Հայ Եկեղեցւոյ կապուածութեան համահայկական խորհրդանիշ դարձած է:
Այսօր ան կը հրճուին աստուածային լուսեղէն կայքերէն և լուսեղէն խորաններէն կը բարեխօսէ Հայ ժողովուրդի միասնակութեան համար»: Այս եղանակաւ, Հոգեւոր Տէրը յայտնեց նաեւ իր պատգամը թէ «Այս աւանդական օրը թանկագին է յատկապէ՛ս հայ Եկեղեցւոյ ու մեր բարեպաշտ ժողովուրդին համար: Հայ Եկեղեցին միակն է որ ծիսական տարուայ հինգ տաղաւարներուն յաջորդ օրը նուիրած է իր ննջեցելաներու յիշատակութեան. Յիրաւի, այստեղ կարծէք կամուրջ մը կայ այս աշխարհի և անդենականի միջեւ. մեր եկեղեցական սրբութիւնները պէտք չէ՛ մոռցուին և պէտք չէ՛ դադրին տօնուելէ, որպէսզի փոխանցուին մեր նոր սերունդին»:
Դարձեալ, Ամենապատիւ և Գերեջանիկ Հոգեւոր Տէրը, հոգեւորական դասը և ժողովուրդը ուղղուեցան Հ. Կ. Եկեղեցւոյ դամբարանները, ուր հոգեհանգստեան պաշտօն կատարուեցաւ Նահատակաց յուշակոթողին առջեւ. Արհի. Լեւոն Արք. Զէքիան «Սուրբ ես Տէր և ի սուրբս հանգուցեալ աղօթքը» արտասանեց ի հանգիստ հայոց սուրբ նահատակներուն: Եզրակաբար, յիշատակութեան արժանի է Սահակ Բ. Մաշալեան Պատրիարքին խորհրդածութիւնը Օր Մեռելոցի առթիւ. «Աստուած մարդուն յատուկ կերպով ստեղծեց, հողի ու Իր Շունչի խառնուրդը դարձուց մարդը: Այնպէս որ, Ադամը հողէն շինեց, ռունգերէն Իր Կեանքի Շունչը փչեց, և մարդը կենդանի էակ դարձաւ: Բայց այն ինչ որ Աստուծոյ կը պատկանի, ետ պիտի դառնայ: Հողն ալ ետ կը դառնայ դէպի աշխարհ: Բայց քանի որ հոգի ունի մարդը, զոր Աստուծմէ առաւ, ուրեմն Աստուծոյ պիտի վերադառնայ:
Ինչ փառաւոր բան է, իրապէս, Աստուծոյ վերադառնալը: Առաջին դարերուն, քրիստոնեաները մահը կը կոչէին հարսանիք, որովհետեւ, մահը Քրիստոսի հետ միանալու պահն էր: Հետեւաբար, երբ մենք սուրբերու տօները կը կատարենք, իրենց ծծնդեան թուականը չենք նշեր, այլ իրենց մահուան թուականը: Որովհետեւ մահը նոր ծննունդն է, նոր կեանքի սկիզբն է, Աստուծոյ հետ՝ յաւերժութեան միանալու պահն է»:
Յիշատակն արդարոց օրհնութեամբ եղիցի։ Խունկ եւ աղօթք հայ ժողովուրդի համայն ննջեցելոց։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
