Ռաֆայէլ Պետրոս ԻԱ. Կաթողիկոս Պատրիարքի Հովուապետական անդրանիկ այցելութիւնը ի Պոլիս և Գերպծ. Հ. Վարդան Թ.Ծ.Վ. Գազանճեանի Պատրիարքական Կառավարիչի առաքելութիւնը

Վատիկան Նիուզ - Հայկական Բաժանմունք

Ուրբաթ` 3 Յունուար 2025-ին, երեկոյեան ժամը 4-ին, Տանն Կիլիկիոյ Կաթողիկէ Հայոց Ամենապատիւ և Գերերջանիկ Տէր Ռաֆայէլ Պետրոս ԻԱ. Կաթողիկոս Պատրիարքը, Պէյրութէն Իսթանպուլ կը ժամանէ, հովուապետական իր անդրանիկ այցելութիւնը տալով Պոլսոյ Հ. Կ. Համայնքին: Արդարեւ, անցեալին Պոլիսը Տանն Կիլիկիոյ Հայ Կաթողիկէ Գահակալներու Աթոռը եղած էր: Տեղին է յիշել նաեւ թէ Պոլսոյ մէջ, մեծ գուրգուրանքով կը պահուին Երանելի նահատակ տէր Կոմիտաս Քհն. Քէօմիւրճեանի աճիւնները: Հովուապետական այցելութեան ուրախալի հանգրուանը պիտի հանդիսանայ Ամենապատիւ և Գերերջանիկ Հոգեւոր Տիրոջ Պոլսոյ Հ. Կ. Աւագ Թեմին նորանշանակ Պատրիարքական Կառավարիչ՝ Գերպծ. Հ. Վարդան Թ.Ծ.Վ. Գազանճեանին ծիսական խորհրդանիշներու տուչութիւնը:

Ռաֆայէլ Պետրոս ԻԱ. Կաթողիկոս Պատրիարքի Հովուապետական անդրանիկ այցելութիւնը ի Պոլիս

Այսպէս, Իսթանպուլի օդակայանին մէջ, Ամեն. Հոգեւոր Տիրոջ և իրեն ընկերացող շքախումբի անդամներուն, յանձինս՝ Գերյ. Հ. Մեսրոպ Ծ. Վ. Թօփալեանի, Գերպծ. Հ. Նարեկ Թ.Ծ.Վ. Նամոյեանի և Գեր. Հ. Մովսէս Վրդ. Տօնանեանին պաշտօնական ընդունելութիւն տեղի ունեցաւ Պոլսոյ Աւագ Թեմի վաստակաւոր նախկին Առաջնորդ Արհի. Հ. Լեւոն Արք. Զէքիեանի, Գերապայծառ Հ. Վարդան Թ.Ծ.Վ. Գազանճեանի, Գերյ. Հ. Միքայէլ Ուչարի և Գերյ. Հ. Աբրահամ Ծ.Վ. Ֆիրաթեան, Արժ. Տէր Վարդան Քհն. Քէշիշեան ինչպէս նաեւ Հ. Կ. Առաջնորդարանի թաղական մարմնի կողմէ:

Այնուհետեւ բարձրաստիճան հիւրերը ուղղուեցան դէպի Ս. Յովհան Ոսկեբերան Եկեղեցի, ուր Ամենապատիւ և Գերերջանիկ Հոգեւոր Տէրը կ'արժանանայ Հ. Կ. Համայնքի ջերմ ընդունելութեան: Երբ Հոգեւոր Տէրը իր շքախումբով մուտք կը գործէ Պոլսոյ Ս. Յովհան Ոսկեբերան Հ. Կ. Եկեղեցին, որ այդ օրը զարդարուած էր մեծագոյն տօնական զարդարանքով՝ եկեղեցւոյ զանգակները իրենց զուարթ ղօղանջներով երկար ատեն կ'աւետեն Կաթողիկոս Պատրիարքին ժամանումը: Հայրապետը շրջապատուած բարձրաստիճան հոգեւորականներէ, առաջնորդուած քահանաներէ և գեղաձայն դպիրներէ, «Հրաշափառ»ի շարականով մուտք կը գործէ տաճար:

Աւագ խորանին առջեւ աղօթք բարձրացնելէ ետք, Գերապայծառ Հ. Վարդանը բարի գալուստի խօսք մը կ'արտասանէ Պատրիարք Հօր հովուապետական անդրանիկ այցելութեան առթիւ Պոլսոյ պատմական Աւագ Թեմին, շեշտելով թէ՝ այստեղ Կաթողիկոս Պատրիարքներու տունն է: Գերերջանիկ Հոգեւոր Տէրը իր կարգին շնորհակալութիւն կը յայտնէ Պոլսոյ Հ. Կ. Աւագ Թեմի հովուապետ՝ Հ. Վարդանին, ինչպէս նաեւ Գերապայծառ Զէքիանին, թաղականներուն, հոգաբարձուներուն և հաւատացեալ ժողովուրդին, որոնք մեծ սիրով ընդառաջ ելած էին զինք ընդունելու:

Ռաֆայէլ Պետրոս ԻԱ. Կաթողիկոս Պատրիարքի Հովուապետական անդրանիկ այցելութիւնը ի Պոլիս

Շաբաթ 4 Յունուար 2025–ին, առաւօտեան ժամը 10–ին, Հ. Կ. Հայրապետը, հոգեւորական դասուն ընկերակցութեամբ այցելեց Պոլսոյ Հայ Առաքելական Եկեղեցւոյ Տէր Սահակ Բ. Պատրիարքին: Հ. Կ. Հայրապետը շրջապատուած բարձրաստիճան հոգեւորականներէ և գեղաձայն դպիրներէ, «Հրաշափառ»ով մուտք գործեց Ս. Աստուածածին տաճար, ուր Հովուապետերը բարձրացան Խորան, որմէ ետք տեղի ունեցաւ Պատարագի ճաշու մասը. Ժամամուտի և Մեծացուսցէ շարականի երգեցողութիւնը կատարեցին տեղւոյն հոգեւորական դասը բարձր կատարողութեամբ. երկուստեք պատգամներ և բարի գալուստի խօսքեր արտասանուեցան, շեշտը դնելով Եկեղեցւոյ միութեան և եղբայրական յարաբերութեան վրայ: Յիշատակութեան արժանի է Սահակ Բ. Պատրիարքի վկայութիւնը Գերապայծառ Հ. Վարդանի մասին, թէ Հոգեւոր Տէր լաւագոյնը ընտրած էր Պոլսոյ Աւագ Թեմին համար: Պատրիարք Հայրը տարիներու փորձառութեամբ տեսած էր Հ. Վարդանի մեծ նուիրումը Եկեղեցւոյ և մեղուաջան աշխատանքը ի սպաս իր համայնքի զաւակներուն: Ապա հոգեւորական դասը ուղղուեցաւ Պատրիարքարանի դահլիճ, ուր հիւրասիրութիւն տեղի ունեցաւ և նուէրներու փոխանակում: Այս առթիւ դարձեալ խօսք առին Գերապայծառ Հ. Լեւոն Արք. Զէքիանը և Հ. Վարդան Գերապայծառը:

Նոյն օրը երեկոյեան ժամը 5–ին, Ս. Ոսկեբերան եկեղեցւոյ մէջ սուրբ և անմահ պատարագ տեղի ունեցաւ, ի ներկայութեան Պոլսոյ բոլոր համայնքապետերուն, ինչպէս՝ Գերաշնորհ Տէր Սահակ Բ. Պատրիարքի և Հայ Առաքելական Եկեղեցւոյ հոգեւորական դասուն, Յոյն Ուղղափառ Եկեղեցւոյ Պատրիարքին ներկայացուցիչ՝ Մետրոպոլիտ Աթենակորասի, Թուրքիոյ Վատիկանի Աւագ դեսպան՝ Տէր Մարէք Սոլչենսկիի, Պոլսոյ Լատին Թեմի Առաջնորդ՝ Արհի. Տէր Մասիմիլիանօ Բալինուրօյիի, Իզմիրի Լատին Առաջնորդ՝ Տ. Մարդին Գրեմէթէքի, Ասորի Կաթողիկէ Քորեպիսկոպոս՝ Տէր Օրհան Չանլիի, Ասորի Եկեղեցւոյ հոգեւորականներու, Քաղդէացի Կաթողիկէ Եպիսկոպոս Տէր Սապրի Անարի և վաստակաւոր եպիսկոպոս Տէր Ռէմզի Կարմուի, Ասորի Ուղղափառ Եպիսկոպոս՝ Տէր Եուսոֆ Չեթինի, Ղպտի Եկեղեցւոյ ներկայացուցիչ հոգեւորականներու, Վերապատուելի Գրիգոր Աղապալողլուի և Հ. Կ. Առաջնորդարանի թաղական մարմնի և հոգաբարձութեան անդամներուն և հաւատացեալ ժողովուրդին: Ամենապատիւ և Գերերջանիկ Հոգեւոր Տէրը հայրապետական Պատարագը մատուցանեց հայ ծէսին ամբողջ շուքով, երգչախումբը մեծ յաջողութեամբ երգեց Կոմիտասեան քառաձայն հիասքանչ Պատարագը: Յընթացս Հայրապետական սուրբ և անմահ Պատարագին, Ամենապատիւ և Գերերջանիկ Հոգեւոր Տէրը պատգամ մը ուղղեց ժողովուրդին, բնաբան ունենալով՝ «Փառք ի բարձունս Աստուծոյ և յերկիր խաղաղութիւն, ի մարդիկ հաճութիւն». Ապա կարդացուեցաւ Գերպծ. Հ. Վարդան Թ.Ծ.Վ. Գազանճեանի Պատրիրքական Կառավարիչ նշանակումի Պատրիարքական նամակը, որմէ ետք բարեջան Հայրապետը օրհնութեան աղօթքով մը Պատրիարքական Կառավարիչի իշխանութեան ծիսական նշանները՝ հովուական գաւազան, խոյր, լանջախաչ և մատանի շնորհեց Հ. Վարդան Գերապայծառին: Պատարագի աւարտին՝ Եկեղեցւոյ կից գտնուող դահլիճին մէջ հիւրասիրութիւն և շնորհաւորութիւններ տեղի ունեցան տօնական մթնոլորտի մէջ:

Ռաֆայէլ Պետրոս ԻԱ. Կաթողիկոս Պատրիարքի Հովուապետական անդրանիկ այցելութիւնը ի Պոլիս

Կիրակի 5 Յունուար 2025–ին, Ս. Աստուածածին Աթոռանիստ եկեղեցւոյ մէջ, որ Թեմին մեծագոյն տաճարներէն մին է, Սուրբ և Անմահ Պատարագ մատուցանեց Գերապայծառ Հ. Վարդան Գերապայծառը, նախագահութեամբ Ամենապատիւ և Գերերջանիկ Հոգեւոր Տիրոջ, ի ներկայութեան Արհի. Հ. Լեւոն Արք. Զէքիեանի, հոգեւորական դասուն, և հաւատացեալ ժողովուրդին: Առաջնորդ Հայրը իր քարոզին մէջ, գոհութիւն յայտնեց Աստուծոյ որ Ամենապատիւ և Գերերջանիկ Հոգեւոր Տէրը և Հ. Կ. Սիւնհոդասական Հայրերը զինք ընտրած էին այսպիսի պատմական Թեմի մը Աթոռին Պատրիարքական Կառավարիչ, ինչ որ մեծ պատիւ պատճառած էր իրեն և միեւնոյն ժամանակ հովուական ծառայութեան մեծ պատասխանատուութիւն զգացնել տուած էր, զոր պիտի գլուխ հանէ Աստուծոյ և իր Թեմի սիրելի զաւակներուն օգնութեամբ: Պատարագի աւարտին՝ Առաջնորդարանի դահլիճին մէջ ճոխ հիւրասիրութիւն տեղի ունեցաւ և շնորհաւորութիւններ:

Նոյն օրը կէսօրէ ետք, Ամենապատիւ և Գերերջանիկ Հոգեւոր Տէրը, հոգեւորական դասուն և թաղականներու ընկերակցութեամբ այցելեցին Պոլսոյ Յոյն Օրթոտոքս՝ Բարթողոմէոս Տիեզերական Պատրիարքին, որ եղբայրական ջերմ ընդունելութիւն ցոյց տուաւ, Պանակեայ մը նուիրելով Հոգեւոր Տիրոջ, իսկ Հ. Վարդանին «Այա Սոփիա»յի խաչին նմանութեամբ լանջախաչ մը: Ամենապատիւ և Գերերջանիկ Հոգեւոր Տէրը և Պոլսոյ Թեմի Առաջնորդը իրենց կարգին՝ նուէրներ փոխանակեցին Պատրիարք Հօր: Բարեջան Հայրապետը նոյն օրը այցելեց նաեւ Օրթագէօյի Ս. Գրիգոր Լուսաւորիչ Եկեղեցին, որ ներկայիս վերանորոգումի ենթարկուած է, Գերապայծառ Հ. Վարդանի և տեղւոյն թաղական մարմնի անդամներուն հսկողութեան տակ: Երկուշաբթի 6 Յունուար 2025–ին, կէսօրին՝ այցելութիւն տրուեցաւ Պոլսոյ Լատին Առաջնորդին և այնտեղ եղբայրական ագապ մը տեղի ունեցաւ ջերմ մթնոլորտի մէջ: Այնուհետեւ Հայրապետական շքախումբը մեկնեցաւ դէպի Պոլսոյ Կուսակալին, որմէ ետք երեկոյեան ժամը 6.00–ին, Յիսուսի Քրիստոսի Մկրտութեան և Աստուածայայտնութեան տօնին առթիւ սուրբ և անմահ Պատարագ և Ջրօրհնէք տեղի ունեցաւ Գարագէօյի Ս. Փրկիչ ամենահին Եկեղեցւոյ մէջ: Երեքշաբթի 7 Յունուար 2025–ին, առաւօտեան ժամը 11–ին, Սուրբ և Անմահ Պատարագ տեղի ունեցաւ Սամաթիոյ Անարատ Յղացեալ Ս. Աստուածածին եկեղեցւոյ մէջ, և Երանելի Տէր Կոմիտաս Քհն. Քէօմիւրճեանին նուիրուած խորանին առջեւ աղօթք: Նոյն օրը կէսօրէ ետք, Մեռելոց ըլլալով՝ Հոգեւոր Տէրը, հոգեւորական դասը և ժողովուրդը Շիշլիի Հայոց գերեզմանատունը գացին հոգեհանգստեան պաշտօն կատարելու հին և նոր ննջեցելոց հոգւոց հանգստեան համար:

Այսպէս, արդիւնաշատ և փառաւոր կերպով աւարտեցաւ Տանն Կիլիկիոյ Կաթողիկէ Հայոց Ամենապատիւ և Գերերջանիկ Տէր Ռաֆայէլ Պետրոս ԻԱ. Կաթողիկոս Պատրիարքի հինգօրեայ հովուապետական այցելութիւնը ի Պոլիս:

Կեցցէ և կեցցէ յաւիտեան Պոլսոյ Աւագ Թեմի Առաջնորդութիւնը, մաղթելով նորանշանակ Պատրիարքական Կառավարիչ՝ Գերապայծառ Հ. Վարդանին երկար տարիներու բեղուն առաքելութիւն որպէս Պատրիարքական Կառավարիչ Պոլսոյ Հ. Կ. Աւագ Թեմին: