Լեւոն ԺԴ.-ի խաղաղութեան կոչերը ի նպաստ Կազայի, Միանմարի եւ Ուքրանիոյ
Ռոպէր Աթթարեան - Վատիկան
Կիրակի` 18 Մայիսին Սուրբ Պետրոս հրապարակին վրայ Պետրոսեան առաքելութեան պաշտօնական սկիզբի պատարագի աւարտին, Լեւոն ԺԴ. Քահանայապետը նոյն վայրէն արտասանեց Ուրախ Լեր Թագուհի Մարեմեան աղօթքը որմէ առաջ սակայն շնորհակալական ողջոյնի խօսք ուզեց յղել համայն աշխարհէն ժամանած բոլոր հաւատացեալներուն, բազմաթիւ Երկիրներու պաշտօնական պատուիրակութիւններու անդամներուն, Եկեղեցիներու ու այլ Կրօններու ներկայացուցիչներուն, յատուկ ողջոյն մը ուղղելով այս օրերուն Հռոմի մէջ իրենց Յոբելեանի ուխտագնացութիւնը կատարող «Եղբայրութիւններու» անդամներուն, որ ըսաւ Ան «վառ կը պահեն ժողովրդական ջերմեռանդութեան մեծ ժառանգութիւնը»։
Ֆրանչիսկոս Պապը մեզի կ՛ընկերանայ Երկինքէն
Քահանայապետը նշեց ապա` թէ պատարագի ժամանակ զգաց «Ֆրանչիսկոս Պապի հոգեւոր ներկայութիւնը , որ Երկինքէն մեզի կ՛ընկերանայ» եւ յիշեց երէկ Ֆրանսայի Շամպերի քաղաքին մէջ Երանելի հռչակուած Camille Costa de Beauregard քահանան, որ «ապրեցաւ 19-րդ դարու աւարտի եւ 20-րդ դարու սկիզբի ժամանակ՝ ըլլալով մեծ հովուական բարեգործութեան վկան»։
Խաղաղութեան կոչ
Քահանայապետը յիշեց հուսկ պատերազմէն տառապող բոլոր եղբայրներն ու քոյրերը, Կազայի մէջ վերապրած մանուկները, ընտանիքները, ու տարեցները «որոնք կը տառապին սովէն», ինչպէս նաեւ Միանմարը ուր «երիտասարդ կեանքեր կը խորտակուին» եւ Ուքրանիան` որ «կը սպասէ արդար ու մնայուն խաղաղութեան բանակցութիւններուն»։
Դառնանք Յարուցեալ Տիրոջ վկաները
«Մինչ Մարիամին կը յանձնենք Հռոմի Եպիսկոպոսի, Տիեզերական Եկեղեցւոյ Հովիւի առաքելութիւնը, Պետրոսի Նաւէն նայինք Անոր` Աստղ Ծովու, Մայր Բարի Խորհրդոյ, որպէս յոյսի նշան։ Անոր բարեխօսութեամբ հայցենք խաղաղութեան պարգեւը, տառապողին համար թիկունք ու մխիթարութիւն, եւ մեզի բոլորիս համար շնորհքը` ըլլալու Յարուցեալ Տիրոջ վկաները» ըսաւ Լեւոն ԺԴ. Քահանայապետը որ ապա հրապարակի վրայ գտնուող 200 հազար հաւատացեալներու հետ միասին աղօթեց Մարեմեան աղօթքը, որուն աւարտին բոլորին շնորհեց իր առաքելական օրհնութիւնը։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
