Կարդինալ Կրէք. «Քահանայապետէն՝ զօրակցութեան եւ քաջալերանքի նշան» Պապին հանդիպումը Սինոդի ներկայացուցիչներուն հետ
Վազգէն Աբարդեան - Վատիկան
Լեւոն ԺԴ. Քահանայապետը Սինոդի Ընդհանուր Քարտուղարութեան մէջ հանդիպում ունեցաւ այն կազմակերպութիւններու ներկայացուցիչներուն հետ, որոնք Հռոմ հաւաքուած էին 23–25 յունիսին՝ մասնակցելու Սինոդական մարմիններու ղեկավարներու հանդիպման, որ միաւորած էր բոլոր մայրցամաքներու պատուիրակները։
«Ուժեղ զօրակցութեան եւ քաջալերանքի նշան»
Կարդինալ Մարիօ Կրէք, Սինոդի ընդհանուր քարտուղարը, հանդիպման աւարտին յայտարարեց, թէ Քահանայապետին հետ հանդիպումը մասնակիցներուն համար եղած է «ուժեղ զօրակցութեան եւ քաջալերանքի նշան»՝ շարունակելու Եկեղեցւոյ սինոդական դարձի գործը։
Համաշխարհային մասնակցութիւն եւ երեքօրեայ աշխատանք
Հանդիպումը, որ տեղի ունեցաւ փակ դռներու ետին, կը գագաթնակէր երեքօրեայ աշխատանքը, ուր ներկայացուած էին Լատին Ամերիկայի, Ափրիկէի, Ասիոյ, Եւրոպայի, Օվկիանիոյ, Միջին Արեւելքի եւ Հիւսիսային Ամերիկայի Եկեղեցիները։ Մասնակիցները Հռոմ եկած էին՝ պատրաստելու 2027–2028 ընդհանուր ժողովներու նախապատրաստական փուլը՝ «Դէպի ժողովներ 2027–2028» փաստաթղթի լոյսին տակ։
Սինոդական գործընթացի ընթացքը եւ տեղական նախաձեռնութիւնները
Կարդինալ Կրէք բացման նիստին ներկայացուց Սինոդական գործընթացի մինչեւ այժմ արձանագրուած ուղին՝ ընդգծելով Եկեղեցւոյ տեղական կառոյցներու նախաձեռնութիւնները՝ ձեւաւորելու սինոդական կրթութիւն, լսողութեան եւ զանազանման մշակոյթ։
Գործադրութեան փուլ եւ նոր ճանապարհային քարտէս
Քննարկումներուն կեդրոնին գտնուեցաւ Սինոդի վերջնական փաստաթուղթի գործադրութեան փուլը, որուն նպատակն է սինոդականութիւնը դարձնել Եկեղեցւոյ մշտական կենսաձեւ։ Մասնակիցները ընդգծեցին փոխադարձ լսողութեան, փոխանակման կարեւորութիւնը՝ որպէս Եկեղեցւոյ միասնական ընթացքի հիմք։
2027–2028 ճանապարհային փուլերը
Աշխատանքային օրերուն ընթացքին ներկայացուեցաւ բազմափուլ ճանապարհային քարտէսը՝ 2027–2028 թուականներու ընդհանուր եկեղեցական ժողովին ընդառաջ։ Անիկա կը ներառէ՝ «Յիշել» փուլը, «Մեկնաբանել» եւ «Ուղղութիւն տալ» փուլերը, մինչեւ 2028-ի հոկտեմբերին Վատիկանի մէջ նախատեսուած Եկեղեցական ընդհանուր ժողովը՝ Սրբազան Քահանայապետին մասնակցութեամբ։
Սինոդականութիւնը՝ շարունակական դարձի ուղի
Մասնակիցները ընդգծեցին նաեւ, որ սինոդական գործընթացը վերջնական հանգրուան մը չէ, այլ շարունակական դարձի ուղի մը, որ կը միտի Եկեղեցւոյ աւելի մեծ մասնակցութեան, լսողութեան եւ համայնքային պատասխանատուութեան ամրապնդման։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ.
