Միջազգային մեծ համբաւ ունեցող արուեստագէտներ կը մասնակցին Վատիկանի մէջ կազմակերպուած գագաթաժողովին

Մարիամ Երեմեան - Վատիկան

Այսօր, Օգոստոս 31-ին Վատիկանի Casina Pio IV դահլիճէն ներս տեղի ունեցաւ «Vitae» հիմնադրամի առաջին գագաթնաժողովի բացումը։

Վատիկանեան առաջին գագաթաժողովը՝ հետևելով Սրբազան Քահանայապետի արուեստագէտներու մասին խօսքերուն, որ զանոնք բնորոշած է. «գեղեցկութեան պահապաններ», «ողջ մարդկութեան յոյսի վկաներ», նպատակ ունի քննարկել ընդհանրական մակարդակով մշակութային նախաձեռնութիւններու զարգացման ռազմավարութիւնները և առաջարկները աւելի լաւ աշխարհ կառուցելու և բոլոր մարդոց միջև միասնութիւնը, յոյսը և հանդիպումը խթանելու համար՝ չնայած տարբերութիւններուն:

Մինչև Սեպտեմբեր 1-ը կայանալիք միջոցառումին կը մասնակցին համաշխարհային մակարդակով կարևոր անձնաւորութիւններ և մեծ համբաւ վայելող արուեստագէտներ ողջ աշխարհէն․ Ամերիկացի դերասան Տենզել Ուաշինկթոնը, իտալացի տենոր Անտրէա Պոչելին, ոճաբան Եւա Քավալլին, քանատացի երգչուհի Ալեսիա Քարան և այլք։ Հանդիպումին կը մասնակցի նաեւ Ֆրանչիսկոս Պապը։

Վերջին տարիներու ընթացքին «Vitae» հիմնադրամի նախագահ Լուիս Քուինելլին և ղեկավար անձնակազմը Սանթա Մարթայի մէջ շարք մը մասնաւոր հանդիպումներ ունեցած են Ֆրանչիսկոս Պապին հետ և Անոր ներկայացուած էին Հիմնադրամի աշխատանքը՝ առաջարկելով Վատիկանը, որպէս առաջին գագաթնաժողովի վայր` 2022 թուականի համար։

Լոնտոնը, Մեքսիքոն և Լոս Անճելեսը «Vitae» -ի գագաթաժողովի համար նախատեսուող յաջորդ քաղաքներն են՝ Վատիկանի մէջ սկիզբ առած աշխատանքը շարունակելու նպատակով։