Կարդինալ Մաթթէօ Ծուփփին որպէս Ֆրանչիսկոս Պապին ներկայացուցիչ կը մեկնի Ուաշինկթըն

Վազգէն Աբարդեան - Վատիկան

Երկուշաբթի, 17 յուլիսին, Սուրբ Աթոռի մամլոյ գրասենեակը հրապարակելով հաղորդագրութիւն մը տեղեկացուց, թէ 17էն-19 յուլիսին, Պոլոնիա թեմի արքեպիսկոպոս եւ Իտալիոյ եպիսկոպոսաց համահաւաք դասի նախագահ, կարդինալ Մաթթէօ Ծուփփի, ուղեկցութեամբ Պետական քարտուղարութենէն պաշտօնեայի մը, որպէս Ֆրանչիսկոս Պապին ներկայացուցիչ կը մեկնի Ուաշինկթըն։

Հաղորդագրութեան մէջ կը նշուի, թէ Կարդինալ Ծուփփիին այցելութիւնը տեղի կ՝ունենայ Ուքրանիոյ մէջ խաղաղութեան զարգացման առաքելութեան շրջագիծէն ներս ու այցելութեան նպատակն փոխանակել գաղափարներ եւ կարծիքներ ներկայ ողբերգական իրավիճակի վերաբերեալ, ինչպէս նաեւ աջակցիլ մարդասիրական նախաձեռնութիւններուն, ամոքելու համար առաւել տուժած եւ առաւել դիւրաբեկ անձերուն տառապանքները, յատուկէն մանուկներունը, նշուած է սուրբ Աթոռին մամլոյ գրասենեակի հրապարակած հաղորդագրութեան մէջ։

Յիշենք, թէ Կարդինալ Ծուփփին, Ուքրանիոյ մէջ խաղաղութեան հաստատման, համար, որպէս միջնորդ առաքելութեան ծիրէն ներս, անցեալ 5էն 6 յունիսին նախ այցելեց Քիեւ ապա 28էն- 29 յունիսին Մոսկուա։

Անցեալ մայիս ամիս, Սուրբ Աթոռի մամլոյ գրասենեակը հրապարակելով հաղորդագրութիւն մը տեղեկութիւններ փոխանցեց Կարդինալ Ծուփփիին, Ֆրանչիսկոս Պապին կողմէ յանձնուած առաքելութեան մասին, որուն վերաբերեալ Ֆրանչիսկոս Պապ նախապէս ակնարկած է Հունգարիայէն վերադարձի ժամանակ։

Վատիկանի Պետական քարտուղար կարդինալ Փիերթօ Փարոլինըա ապա անդրադառնալով Իտալիոյ եպիսկոպոսաց համահաւաք դասի նախագահին յանձնուած առաքելութեան, նշեց թէ այդ առաքելութիւնը չ՝ունի անմիջական նպատակ միջնորդութիւնը այլ նախ եւ առաջ փորձել նպաստել այնպիսի միջավայրերուն որոնք կարողութիւնը ունին առաջնորդելու դէպի խաղաղութեան ուղիներ։