Յոյսը հակաթոյն՝ սպասուածից աւելի երկիւղալի թուացող ապագայի մարտահրաւէրների դէմ․ Կարդինալ Փիեթրօ Փարոլին

Մարիամ Երեմեան - Վատիկան

«Լեւոն ԺԴ․ Սրբազան Քահանայապետի եւ իմ անունից ամենայն բարիք եմ մաղթում ճապոնացի ժողովրդին՝ յոյսով, որ այս Երկրում ապրող բոլոր մարդիկ կօրհնուեն բարգաւաճմամբ եւ խաղաղութեամբ»։ Այս խօսքերով 2025թ․ յունիսի 29-ին Պետքարտուղար Կարդինալ Փիեթրօ Փարոլինը ողջունեց «Էքսփօ Օզաքա 2025»-ում Սուրբ Աթոռի օրուայ մասնակիցներին՝ յիշեցնելով, որ աւելի քան 80 տարի առաջ հաստատուած դիւանագիտական ​​հարաբերութիւնները այսօր հիմնուած են բազմաթիւ ընդհանուր արժէքների եւ արդիւնաւէտ համագործակցութեան վրայ, մասնաւորապէս կրթութեան, առողջապահութեան եւ հասարակական օգնութեան ոլորտներում:

Խաղաղութիւնը որպէս առաջնահերթութիւն

«Կան այլ՝ մեր երկուսի համար թանկ, առաջնահերթութիւններ․ դրանք խաղաղութիւնը, կայունութիւնը եւ զէնքի անվերահսկելի տարածումը սահմանափակելու մեր համատեղ ջանքերն են», - շեշտեց Փարոլինը։ Այս առումով նա նշեց, որ այս տարի լրանում է Հիրոշիմայի եւ Նակազաքիի ատոմային ռմբակոծութիւնների 80-ամեակը։ Ողբերգական իրադարձութիւն, որն ըստ Պետքարտուղարի «նշանաւորեց այս Երկրի պատմութիւնը եւ որն աւելի ձեւաւորեց խաղաղութեանը նրա անսասան յանձնառութիւնը»:

Սուրբ Աթոռ – Ճապոնիա պատմական տարեդարձեր

Պետքարտուղարը իր ելույթում յիշատակեց Սուրբ Աթոռի եւ Ճապոնիայի միջեւ յարաբերութիւնների որոշ պատմական տարեդարձեր, որոնք աւելի քան 400 տարուայ պատմութիւն ունեն եւ վկայում են երկարատեւ եւ զարգացող յարաբերութիւնների մասին:

Յարաբերութիւններ, որ չնայած մշակութային եւ կրօնական տարբերութիւններին, ժամանակի ընթացքում ամրապնդուել են ընդհանուր արժէքների եւ կրթութեան, առողջապահութեան եւ հասարակական օգնութեան ոլորտներում համագործակցութեան միջոցով:

Գեղեցկութեան եւ յոյսի կարեւորութիւնը

Յղում կատարելով Սուրբ Աթոռի տաղաւարի համար ընտրուած «Գեղեցկութիւնը յոյս է բերում» թեմային, Վատիկանի Պետքարտուղարն ընդգծեց, որ «դրանք կաթողիկէների համար հիմնարար արժէքներ են», քանի որ, - բացատրեց նա,- «դրանցում տեսնում ենք Քրիստոսի եւ Նրա գործողութեան արտացոլումը պատմութեան մէջ։ Մեզ համար Նա աստուածային գեղեցկութեան առաւելագոյն արտայայտութիւնն է. գեղեցկութիւն, որը գերազանցում է պարզ արտաքին տեսքը՝ դիպչելու մարդկանց սրտերին եւ հոգիներին։ Քրիստոսը նաեւ մարդու յոյսն է, քանի որ իր կեանքով եւ մահով նա բացեց փրկութեան եւ նորոգման ճանապարհ ողջ մարդկութեան համար»։

Հասարակական գեղեցկութիւն

Հետեւաբար, գեղեցկութիւնն ու յոյսը արժէքներ են, որոնք մենք՝ կաթողիկէներս, ցանկանում ենք կիսել ամբողջ աշխարհի հետ՝ վստահ լինելով, որ դրանցից կարող է ծնուել բոլորի համար աւելի լաւ ապագայ, յարեց Փարոլինը եւ կոչ արեց գեղեցկութիւնը փնտռել ու տեսնել մարդկային համայնքում, հասարակական նախաձեռնութիւնների տարածման, կամաւորական եւ համերաշխութեան նախագծերում, որոնք «բերրի սերմ են, որից մեր հասարակութիւններն ու մեր քաղաքականութիւնը կարող են ուժ քաղել՝ նախագծերը թարմացնելու եւ մեր արդի աշխարհի բազմաթիւ մութ վայրերում լոյս սփռելու համար»։

Յոյսը՝ վախի հակաթոյն

Յոյսը միահիւսուած է Աստծոյ հանդէպ վստահութեան, ընդհանուր բարօրութեան նկատմամբ առարկայական նուիրուածութեան հետ եւ խթանում է համայնքի եւ փոխադարձ պատասխանատուութեան զգացումը, շարունակեց Վատիկանի Պետքարտուղարը՝ յաւելելով, որ «այս առաքինութիւնը այսօր առաւել քան երբեւէ անհրաժեշտ է թւում։ Բազմաթիւ հակամարտութիւններով եւ հսկայական համընդհանուր մարտահրաւէրներով բնութագրուող դարաշրջանում ապագան երբեմն սպասուածից աւելի շատ երկիւղալի է. միայն յոյսի մէջ ենք գտնում վախի հակաթոյն եւ նուիրուածութեան եւ գործողութեան խրախուսում»։ Յոյսը միջազգային մակարդակում «դառնում է երկխօսութեան եւ համագործակցութեան անսասան յանձնառութեան կոչ, յատկապէս, երբ լարուածութիւնն ու հակամարտութիւնները թուում են անյաղթահարելի»։

Կոչ խաղաղութեան, երկխօսութեան եւ համագործակցութեան

Ծիրանաւորը, ի վերջոյ իր խօսքը եզրափակեց՝ մէջբերելով Լեւոն ԺԴ․ Սրբազան Քահանայապետի կողմից՝ իր ընտրութեան օրը, կատարած յորդորը, որպէսզի կամուրջներ կառուցուեն, երկխօսութիւններ հիւսուի, ձեռք ձեռքի տրուի՝ «զինաթափուած և զինաթափեցնող, խոնարհ և յամառ խաղաղութիւն» խթանելու համար։