«Ձեր տարեցները պիտի երազեն». Տարեցներուն Հովուական ծառայութեան նուիրուած Համագումար
Ռոպէր Աթթարեան - Վատիկան
«Ձեր տարեցները պիտի երազեն». Այս է ընտրուած նիւթը` տարեցներու հովուական ծառայութեան նուիրուած երկրորդ միջազգային համագումարին, որ կազմակերպուած է Աշխարհականներու, Ընտանիքի և Կեանքի Վերատեսչութեան կողմէ եւ տեղի պիտի ունենայ 2025 թուականի հոկտեմբերի 2-4-ը Հռոմի Յիսուսեան Միաբանութեան Մայր վանքին մէջ։
Առաջնորդուելով Հովել մարգարէի գիրքի նախադասութենէն, զոր բազմիցս մէջբերած է հանգուցեալ Ֆրանչիսկոս Պապը, վերոնշեալ հաւաքին պիտի մասնակցին 65 երկիրներէ 150 պատուիրակներ, որոնք կը ներկայացնեն 55 եպիսկոպոսական համահաւաք դասերը, ինչպէս նաև տարեցներու հովուական խնամքով զբաղուող միութիւններ և կրօնական հաստատութիւններու անդամներ:
Ֆարրել. Տարեցները` Եկեղեցւոյ ներկան և ապագան
«Յեղաշրջուող աշխարհի մը մէջ, ուր ծերացման ձևը նոյնպէս խոր փոխակերպումի ենթարկուած է, համագումարը նպատակ ունի արձագանքել «կարիքի մը որ միշտ աւելիով հրատապ է՝ այն է զարգացնել տարեցներու համար հովուական խնամք, որ համարժէք ըլլայ մեր ժամանակներու մարտահրաւէրներուն», ըսաւ այս առիթով կազմակերպիչ Վերատեսչութեան Վերատեսուչ Կարդինալ Քեվին Ֆարրելը աւելցնելով` որ «տարեցները միայն Եկեղեցւոյ անցեալը չեն այլ նաեւ անոր ներկան եւ ապագան» ու թէ այս համագումարը առիթ է ունկնդրելու, խորհրդածելու ու միասին նոր հարցերու համար մշակելու նոր պատասխաններ։
Սոյն համագումարը շարունակութիւնն է 2020-ին սկիզբ առած ուղեւորութեան մը` «Տարիներուն հարստութիւնը» բնաբանով համագումարով, որ երբեք դադար չի ճանչցաւ։ Արդարեւ 2021 Ֆրանչիսկոս Պապի որոշումով հաստատուեցաւ Տարեցներու, Մեծ Մամիկ- Պապիկներու համաշխարհային օրը, ապա 2022-ին հանգուցեալ Քահանայապետը ծերութեան նիւթին նուիրեց շարք մը խորհրդածութիւններ, Եկեղեցւոյ ուշադրութիւնը հրաւիրելով այս նիւթին վրայ։ Եւ այժմ այս միջազգային համագումարը նկատուած էնոր քայլ մը` որոնելու համար դէպի ապագայ տանող նոր ուղիներ։
Տարեցներու երազանքները. ապագայի տեսլական
Հովել մարգարէի ներշնչումով ստեղծուած Համագումարի թեման կը հրաւիրէ մտորելու «տարեցներու երազանքների» մասին՝ որպէս Եկեղեցւոյ և հասարակութեան ոգեշնչումի աղբիւր: Որոշ տարեց մարդիկ պիտի կիսեն իրենց տեսլականները կարևոր հարցերու մասին, ինչպիսիք են խաղաղութիւնը, միասին ապրիլը, հաւատքի փոխանցումը և հասարակաց տան խնամքը: «Կենդանի վկայութիւններ, որոնք կարող են ցոյց տալ, թէ ինչպէս երազները յաւերժական են և տակաւին կարող են նոր սերունդներուն ցոյց տալ ճանապարհը»:
Համայնքներու տրոփող սիրտը
«Տարեցները մեր համայնքներու տրոփող սիրտն են, և անոնց ներդրումը կարևոր է Եկեղեցւոյ ապագայի համար» արձագանգեց Գերապ. Տարիօ Ճերվազին` Աշխարհականներու, Ընտանիքի եւ Կեանքի Վերատեսչութեան օգնական Քարտուղարը։
Գրեթէ երեք օր տեւող միջազգային հանդիպումին բացումը կը կատարուի 2 հոկտեմբերի առաւօտեան Կարդինալ Ֆարրելի նախաբանով, որուն կը յաջորդեն նիստեր՝ նուիրուած «Տարեց մարդկանց իրականութիւնը այսօր», «Մնացորդացի մշակոյթը» և «Տարեց մարդկանց հոգևորութիւնը» թեմաներուն: 3 հոկտեմբերի առաւօտեան նախատեսուած է Լեւոն ԺԴ. Պապին հետ հանդիպումը մինչ համագումարի եզրափակումը կը կատարէ Վերատեսչութեան օգնական քարտուղար՝ Գերապայծառ Ճերվազի, 4 հոկտեմբերի առաւօտեան։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
