«Աստուած ճշմարիտ իրականութիւնն է» Պենետիկտոս ԺԶ Պապին անտիպ գիրքի ներկայացումը

Ռոպէր Աթթարեան - Վատիկան

Հինգշաբթի 11 դեկտեմբեր 2025-ի երեկոյեան ժամը 5,30-ին Վատիկանի մօտակայքը գտնուող Պիոս Ժ. դահլիճին մէջ պիտի ներկայացուի Պենետիկտոս ԺԶ Քահանայապետին «Աստուած ճշմարիտ իրականութիւնն է» վերտառութեամբ անտիպ գիրքը որուն մէջ պարունակուած են Անոր 2005 – 2017 անտիպ քարոզները։ Գիրքը հրատարակուած է Վատիկանի հրատարակչատան կողմէ ու կազմուած է 448 էջերէ։

Ներկայացումին առիթով բարի գալուստի խօսք պիտի արտասանեն Ժոզէֆ Ռացինկեր – Պենետիկտոս ԺԶ Հիմնարկի նախագահ` Հայր Ֆետերիքօ Լոմպարտին եւ Վատիկանի հրատարակչատան խմբագրական պատասխանատու տիար Լորեցնօ Ֆացցինին։ Ապա ելոյթ պիտի ունենան Լիթուանիայի, Էսթոնիայի եւ Լաթուիայի մօտ առաքելական նուիրակ եւ Պենետիկտոս ԺԶ Պապին երբեմնի քարտուղար` Գերապ. Կէորկ Կէյնզուէյնը եւ Հայր Ֆապիօ Ռոզինին, Սուրբ Խաչ Քահանայապետական  ​​Համալսարանի քարոզագիտութեան փրոֆեսոր։ Հանդիպումը կը վարէ «L'Osservatore Romano»-ի լրագրող Սիլվիա Կուիտին։

Գիրքը համադրուած է Ռիքքարտօ Պոլլաթիի, Լուքա Քարուզոյի եւ Հայր Ֆետերիքօ Լոմապրտիի կողմէ եւ գրատուներու մէջ պիտի վաճառուի այսօրուընէ սկսեալ։