Վառելանիւթերու սակագիներու բարձրացումը բռնկեցուց Լիբանանեան փողոցը։
Կենցաղային եւ ապրուստի ամէնօրեայ մտահոգութիւններու հեւքի մթնոլորտին մէջ ապրող լիբանանցիք երէկ արթնցան վառելանիւթի սակագիներու նոր յաւելումի «աւետիսով»: Այս մասին հաղորդող լրատուութիւնը մէկ թիթեղ պենզինին սակագինը կը նշէր 312.700 լիբ. ոսկի եւ յարակից յաւելումներ մազութի եւ պիւթակազի սակագիներուն վրայ: Աւելի՛ն, պատկան մարզերու կարգ մը պատասխանատուներ յոռետեսութեամբ եւ ընդվզումով յայտարարեցին, որ այս ընթացքով նշեալ սակագինը կրնայ յառաջիկայ շաբաթներուն հասնիլ մինչեւ 400 հազար լիբ. ոսկիի սահմանը` յաւելումը վերագրելով վառելանիւթի միջազգային սակագինին` ըստ ամերիկեան տոլարին:
Որոշումը, որ 60 հազար լիբ. ոսկիի յաւելում կ՛որոշէր թիթեղ մը պենզինի սակագինին վրայ, իր խոր ազդեցութիւնը ունեցաւ առհասարակ լիբանանեան հասարակութեան վրայ: Այս գծով լիբանանեան զանազան շրջաններու մէջ ցուցարարներ ինքնաբուխ կերպով փողոց դիմեցին` բողոքելով նշեալ որոշումին դէմ: Մայրաքաղաք Պէյրութէն մինչեւ Թրիփոլի, Սայտա, Շեքքա եւ Ճիւնի մայրուղիներ եւ փողոցներ փակուեցան որոշ ժամանակով: Կարգ մը շրջաններու մէջ հրկիզուած անիւներով ընդվզած քաղաքացիներ բողոքեցին եւ փակեցին ճամբաները: Անոնք իրենց պոռթկումը արտայայտեցին տիրող կենցաղային ու ապրուստի «անտանելի» կացութեան գծով, ուր տոլարին սակագինը հասած է 21 հազար լիբ. ոսկիի սահմանը, մինչ աշխատաւորներու կարեւոր մէկ հատուածը իր ամսաթոշակը կը ստանայ լիբանանեան թղթոսկիով: Իսկ նուազագոյն ամսականը տակաւին 675 հազար լիբ. ոսկի է:
Աշխատաւորներու ընդհանուր համադաշնակցութիւնը ժողով մը գումարելով յայտարարեց, թէ յառաջիկայ շաբթուան ընթացքին պիտի քննարկուի այս հարցը, եւ որոշուի առնուելիք բողոքի քայլերը: Համադաշնակցութեան նախագահ Պշարա Ասմար մամլոյ ասուլիս մը տալով յայտարարեց, որ այս յաւելումը պիտի առաջնորդէ այլ մարզերու մէջ եւս յաւելումներու, եւ մարդիկ անկարող պիտի ըլլան նոյնիսկ իրենց աշխատավայրը հասնելու:
Նմանապէս, երթեւեկի վարորդներ մինչեւ երկուշաբթի օր պայմանաժամ տուին պատկան կողմերուն` այլապէս սպառնալով յաւելում կատարել երթեւեկի ծառայութեանց գիներուն վրայ:
Քաղաքական առումով նախկին նախարար, գնդապետ Մարուան Շարպէլ պատահածը որակեց «արուեստական» քայլ, որուն միջոցով կարգ մը իշխանաւորներ կը միտին քաղաքացիները արգիլել քուէատուփ հասնելէ եւ հոն առաջնորդել միայն իրե՛նց համակիր քաղաքացիները` ապահովելով անոնց եւ երթեւեկի վառելանիւթին սակը: Շարպել պատկերասփռուած հարցազրոյցի ընթացքին կոչ ուղղեց քաղաքացիներուն անպայման մասնակցելու յառաջիկայ ընտրութեանց, ի հարկին հետիոտն երթալով. եթէ նոյնիսկ վառելանիւթի սակագինը չունին, մերժեն ներկայ վարիչներու «ֆինանսաւորումը» եւ հետիոտն երթան ու ընտրեն իրե՛նց ուզած թեկնածուն:
Աղբիւրը` Ազդակ
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ