Որոնել

Vatican News
Հայ համայնքի ընկերային ծառայողներու միութիւն. Հայ համայնքի ընկերային ծառայողներու միութիւն. 

Հայ համայնքի ընկերային ծառայողներու միութիւն. 80 տարեցներ այցելեցին Պիքֆայայի Ս. Աստուածածին վանք եւ Մրուժ

Այցելութիւնը կը նպատակադրէր Արամ Ա. վեհափառ հայրապետին հետ մօտէն հանդիպում մը ունենալ, զրուցել Լիբանանի դիմագրաւած անցեալի ու ներկայի իրավիճակը եւ այս վերջինին ազդեցութիւնը` անոնցմէ իւրաքանչիւրին առօրեային վրայ, ինչպէս նաեւ իրենց երախտագիտութիւնը յայտնել վեհափառին` լիբանանահայութեան նկատմամբ իր ցուցաբերած նիւթաբարոյական աջակցութեան համար:
Ունկնդրէ լուրը

Հայ համայնքի ընկերային ծառայողներու միութիւնը, հաւատարիմ մնալով հայ մանուկին ու տարեցին հոգեւոր եւ մարմնաւոր սնունդ մատակարարելու եզակի առաքելութեան, Ս. Աստուածածնայ վերափոխման տօնին առիթով, ուրբաթ, 12 օգոստոս 2022-ին նախաձեռնեց ուխտագնացութիւն-այցելութիւն մը: Սոյն ծրագիրին իրենց մասնակցութիւնը բերին հայ համայնքի ընկերային եւ բժշկական տարբեր կեդրոններու կողմէ ներկայացուած տարեց մայրերն ու հայրերը:

Այցելութիւնը կը նպատակադրէր Արամ Ա. վեհափառ հայրապետին հետ մօտէն հանդիպում մը ունենալ, զրուցել Լիբանանի դիմագրաւած անցեալի ու ներկայի իրավիճակը եւ այս վերջինին ազդեցութիւնը` անոնցմէ իւրաքանչիւրին առօրեային վրայ, ինչպէս նաեւ իրենց երախտագիտութիւնը յայտնել վեհափառին` լիբանանահայութեան նկատմամբ իր ցուցաբերած նիւթաբարոյական աջակցութեան համար:

Այս ընկերային այցելութեան ընկերացաւ Նիւ Եորքէն Լիբանան ժամանած դոկտ. Քարլօ Պայրագտարեանը` տարեցներու մասնագէտ-հոգեբուժը (geriatric psychopharmacologist):

Հայ համայնքին մէջ գործող տարբեր կառոյցներու կողմէ ներկայացուած 80 տարեցները ներկայ գտնուեցան Աստուածամօր նուիրուած բացօթեայ աղօթքի արարողութեան, որմէ ետք տեղի ունեցաւ աղի եւ խունկի օրհնութիւնը:

Դպրեվանքի սաներու երգեցողութենէն ետք անոնք ունկնդրեցին Արամ Ա. կաթողիկոսին պատգամը, հայրական խրատներն ու բարեմաղթութիւնները:

Իրենց կարգին, տարեցները իրենց սրտի խօսքը ուղղեցին վեհափառ հօր, որմէ ետք լիբանանահայութեան եւ հայ համայնքէն ներս գործող բոլոր ընկերային ծառայողներուն անունով վարչութիւնս յուշանուէր մը յանձնեց վեհափառին` առ ի երախտագիտութիւն անոր տածած խնամքին:

Օրհնուած խունկն ու աղը ստանալէ ետք տարեցները մայրավանքի շրջափակին մէջ խմբային նկար մը ունեցան:

Աղօթքով եւ օրհնութեամբ ներշնչուած մեր հայրերն ու մայրերը մեկնեցան Մրուժ, ուր ունեցան իրենց ճաշն ու ընկերային պահերը: Անոնք երգով եւ ասմունքով ճոխացուցին մթնոլորտը:

Աւարտին, պաղպաղակի հիւրասիրութիւն տեղի ունեցաւ:

Թող Աստուածամայրը պահպանէ մեր ազգի բոլոր զաւակները, եւ մեզ` ընկերային ծառայողներուս, պարգեւէ առաւել եւս լայն եւ բարեգութ սիրտ, որպէսզի կարենանք առաւել եւս ծառայել մեր ժողովուրդի զաւակներուն:

Շնորհաւոր բոլոր անոնց, որոնք Աստուածամօր անունը կը կրեն:

Աղբիւրը՝ Ազդակ

19/08/2022, 10:05