Լաւրով. «Կը կարծեմ, որ Լաչինի Միջանցքին շուրջ կացութիւնը մօտ օրէն կը լուծուի»
Հայ-ազրպէյճանական սահման Հաւաքական անվտանգութեան պայմանագիրի կազմակերպութեան (ՀԱՊԿ) առաքելութիւն ուղարկելու մտադրութիւնը տակաւին ուժի մէջ է: «Արմէնփրես»-ի համաձայն, այս մասին յայտարարած է Ռուսիոյ արտաքին գործոց նախարար Սերկէյ Լաւրով 2022 թուականին ռուսական դիւանագիտութեան գործունէութեան արդիւնքներուն նուիրուած մամլոյ ասուլիսի ընթացքին:
«Մենք մինչեւ հիմա պատրաստ ենք ՀԱՊԿ-ի առաքելութիւն ուղարկելու Հայաստանի եւ Ազրպէյճանի սահման», անոր խօսքը կը մէջբերէ ԹԱՍՍ լրատու գործակալութիւնը:
Լաւրով աւելցուցած է, որ Ազրպէյճանի եւ Հայաստանի սահմանին վրայ Եւրոպական Միութեան առաքելութիւնը կրնայ հակաարդիւնաւէտ ըլլալ, եթէ Պաքուն ատոր համաձայնութիւն չտայ:
«Հակառակ այն հանգամանքին, որ մենք դաշնակիցներ ենք եւ որ ՀԱՊԿ-ի առաքելութիւնը ամբողջովին պատրաստ է, հայկական կողմը կը նախընտրէ բանակցութիւններ վարել Եւրոպական Միութեան հետ, որպէսզի այնտեղ երկարաժամկէտ հիմքով տեղակայուած ըլլայ քաղաքային դէտերու առաքելութիւնը: Ատիկա Ազրպէյճանի հետ սահմանն է, եւ, հաւանաբար, եթէ այդ առաքելութիւնը տեղակայուի առանց Ազրպէյճանի համաձայնութեան, ատիկա կրնայ պարզապէս հակաարդիւնաւէտ ըլլալ: Սահմանին վրայ վստահութիւն ստեղծելու փոխարէն ատիկա կրնայ լրացուցիչ գրգռութիւն ստեղծել», ըսած է Լաւրով:
«Մենք դժուարութիւններ ունինք` Հայաստանի մէջ տիրող կացութեան առնչուած. երբ մեր հայ ընկերները ըսին, որ անհրաժեշտ է ՀԱՊԿ-ի առաքելութիւն ուղարկել Ազրպէյճանի հետ սահման` այնտեղ կայունութիւն ապահովելու համար, մենք երեւանեան վեհաժողովին համաձայնեցանք այս առաքելութեան շրջագիծերուն վերաբերեալ նման փաստաթուղթի շուրջ, սակայն չյաջողեցանք զայն որդեգրել, որովհետեւ հայ գործընկերները սկսան պնդել, որ այս փաստաթուղթը պէտք է բովանդակէ Ազրպէյճանի հասցէին խիստ դատապարտում:
«Բացատրեցինք, որ եթէ դատապարտման մասին կը խօսինք, եթէ հռետորաբանութեան, դիրքորոշում ներկայացնելու մասին կը խօսինք, ապա այստեղ իւրաքանչիւրը ազատ է ընել այն, ինչ որ կ՛ուզէ: Սակայն եթէ կ՛ուզենք ՀԱՊԿ-ի առաքելութիւն ուղարկել, ապա, ըստ երեւոյթին, ատիկա անպայման պայմանաւորուած չէ արտաքին որոշ նշաններով, որոշ յայտարարութիւններով, առաւել եւս կոշտ», ըսած է ան:
Ան նշած է, որ 17 յունուարին հաղորդակցութիւն ունեցած է Ազրպէյճանի արտաքին գործոց նախարար Ճէյհուն Պայրամովի հետ եւ յիշեցուցած, որ Բերձորի միջանցքը 9 նոյեմբեր 2020-ի եռակողմ համաձայնութեան համաձայն, պէտք է ազատ ըլլայ բեռներու, քաղաքացիներու եւ փոխադրամիջոցներու երթեւեկին համար:
«Լաչինի միջանցքը պէտք է երկկողմանի բաց ըլլայ մարդոց, բեռներու համար: Առանձին որոշուած էր, որ այդ միջանցքով զինուորական բեռներ պէտք չէ անցնին: Ազրպէյճանցիները տուեալներ տրամադրած են, թէ հայկական կողմը ականներ տեղափոխած եւ ականապատած է Ազրպէյճանի հետ սահմանակից շրջանները եւ այլն. մեր զինուորականները զանոնք կ՛ուսումնասիրեն: Այնտեղ բազմաթիւ փոխադարձ մեղադրանքներ կան», ըսած է Լաւրով:
Ռուսիոյ արտաքին գործոց նախարարը ընդգծած է, որ Ռուսիան յստակ բան մը առաջարկած է. Ռուսիոյ խաղաղապահները բոլոր կարելիութիւնները ունին ստուգելու միջանցքէն անցնող բեռները` արգիլուած ապրանքներու տեղափոխումը կանխարգիլելու համար:
«Տառացիօրէն երէկ կամ նախորդ օր հանդիպած են Ռուսիոյ խաղաղապահները, ազրպէյճանցիները եւ Ղարաբաղի ներկայացուցիչները: Կը կարծեմ` հարցը (միջանցքի բացումը) մօտ օրէն կը լուծուի», ըսած է Լաւրով:
Աղբիւրը` Ազդակ
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ