Ցուցարարներ ներխուժեցին Պաղտատի մէջ Շուէտի դեսպանատուն եւ հրկիզեցին զայն
Հարիւրաւոր ցուցարարներ երէկ արշալոյսին ներխուժեցին Պաղտատի մէջ Շուէտի դեսպանատուն` բողոքելով Սթոքհոլմի մէջ Իրաքի դեսպանատան առջեւ Քորանի հրկիզման արտօնման դէմ, որ Սթոքհոլմի մէջ իր տեսակին մէջ իրերայաջորդ երկրորդ դէպքն է:
Ցուցարարները դեսպանատան շէնք մուտք գործելով հրկիզեցին զայն: Անվտանգութեան աղբիւրներ «Մայատին» արբանեակային պատկերասփիւռի կայանին յայտնած են, որ դեսպանատան անձնակազմը տեղափոխուած է Իրաքի մէջ Միացեալ Նահանգներու դեսպանատուն: Իրաքեան իրաւապահ մարմինները ցուցարարները ցրուելու համար օգտագործեցին ջրաշիթ մեքենաներ եւ ելեկտրահար գաւազաններ: Ցուցարարները հակադարձեցին անոնց վրայ քարեր նետելով:
Դէպքը տեղի ունեցաւ Շուէտի մէջ արտօնումէն ետք իրաքեան դեսպանատան առջեւ ցոյցի, որուն ընթացքին կը ծրագրուի Քորանը եւ Իրաքի դրօշը հրկիզել:
Շուէտի վարչապետ Օլֆ Քրիսթերսոն յայտնեց, որ արտօնութիւնը «օրինական է, սակայն ոչ յարմար»:
Շուէտի արտաքին գործոց նախարարութիւնը դատապարտեց Իրաքի մէջ իր դեսպանատան հրկիզումը` իրաքեան իշխանութիւնները պատասխանատու նկատելով դիւանագիտական առաքելութիւններու եւ անոնց անձնակազմերու պաշտպանութեան համար:
Իրաքի արտաքին գործոց նախարարութիւնը բուռն կերպով դատապարտեց Պաղտատի մէջ Շուէտի դեսպանատան հրկիզման դէպքը:
Իրաքի վարչապետի գրասենեակի պաշտօնատարներէն մէկը «Ժազիրա» արբանեակային պատկերասփիւռի կայանին յայտնեց. «Եթէ Քորանի հրկիզման դէպքը կրկնուի, պիտի խզենք Շուէտի հետ յարաբերութիւնները:
Աւելի ուշ, Իրաք Շուէտի դեսպանէն պահանջեց իր հողերէն հեռանալ, իսկ Սթոքհոլմի մէջ իր դեսպանատան գործավարը տուն կանչեց:
Միացեալ Նահանգներու արտաքին գործոց նախարարութիւնը բուռն կերպով դատապարտեց Իրաքի եւ Շուէտի դեսպանատան վրայ կատարուած յարձակումը:
Աղբիւրը՝ Ազդակ
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ