Գերագոյն հոգեւոր խորհուրդը արձագանգեց Արցախի մէջ Պաքուի աճող նկրտումներուն

Գերագոյն հոգեւոր խորհուրդը հանդէս եկաւ Արցախի ծանր կացութեան վերաբերող յայտարարութեամբ մը` խորապէս մտահոգիչ  նկատելով այն, որ, հակառակ Ռուսիոյ խաղաղապահ զօրախումբին ներդրած ջանքերուն, Ատրպէյճանի թշնամանքը կը ստանայ նոր ծաւալներ: «Արմէնփրէս»ը այս մասին տեղեկացաւ Մայր Աթոռի տեղեկատուական համակարգէն:

Նշեալ յայտարարութեան մէջ կ՛ըսուի հետեւեալը.

«Վրդովմունքով ենք արձանագրում, որ Ադրբեջանի ռազմատենչ ու հայատեաց շարունակուող գործողութիւնների, Արցախի ամբողջական շրջափակման հետեւանքով առաւել խորանում է հումանիտար (մարդասիրական) իրավիճակը Արցախում: Խորապէս մտահոգիչ է, որ, հակառակ ՌԴ խաղաղապահ զօրախմբի ներդրած ջանքերի` ադրբեջանական ագրեսիան (յարձակումը) ստանում է նոր ծաւալներ:

«Ստեղծուած ծանր կացութեան մէջ, երբ Արցախի ժողովուրդը զրկուած է անհրաժեշտ սննդի, դեղորայքի եւ կենսական պարագաների մատակարարումներից եւ բախւում է Ադրբեջանի ցեղասպանական գործողութիւններին, դիմում ենք Մինսկի խմբի համանախագահող երկրներին, Եւրամիութեան անդամ պետութիւններին` հրատապօրէն ձեռնարկել կանխարգելիչ գործողութիւններ, այդ թւում` Ադրբեջանի նկատմամբ պատժամիջոցներ, որպէսզի ժամ առաջ ապաշրջափակուի Արցախի կեանքի ճանապարհը` Բերձորի (Լաչինի) միջանցքը, եւ վերականգնուի բնականոն կեանքը Արցախի Հանրապետութիւնում: Հարկ է, որ միջազգային հանրութիւնը առաւել գործնական քայլերով դատապարտի Ադրբեջանի անմարդկային եւ թշնամական քաղաքականութիւնը` ուղղուած Արցախի ժողովրդի դէմ: Հարկադրանքի եւ հաշուեյարդարի սպառնալիքների ներքոյ Արցախում չի կարող հաստատուել խաղաղութիւն:

«Մեր յորդորն ենք ուղղում Հայաստանի Հանրապետութեան իշխանութիւններին` հրաժարուել զիջողական կեցուածքներից, դրսեւորել վճռականութիւն եւ մարդու հիմնարար իրաւունքների համապարփակ կիրառմամբ ապահովել իրավիճակի այնպիսի հանգուցալուծում, որը երաշխիք կը դառնայ հայրենի հողի վրայ Արցախի ժողովրդի անկախ, անվտանգ ու արժանապատիւ կեանքի:

«Յորդորում ենք համայն մեր ժողովրդին ի Հայաստան եւ ի Սփիւռս` աննուազ հետեւողականութեամբ շարունակել ջանքեր ներդնել` ի զօրակցութիւն Արցախ աշխարհի եւ նրա հաւատաւոր ու հերոսական ժողովրդի: Թող Աստուած օրհնի Հայաստան եւ Արցախ մեր երկիրը եւ աշխարհասփիւռ մեր ժողովրդին. Ամէն»:

Աղբիւրը՝ Ասպարէզ