Չեխ աշխարհահռչակ գրող Միլան Քունտերա մահացաւ

11 յուլիսին 94 տարեկանին վախճանած է ծագումով չեխ ֆրանսացի գրող Միլան Քունտերան: Այդ մասին կը յայտնէ «Լը Մոնտ» ֆրանսական պարբերականը:

Միլան Քունտերա կը նկատուի արդի գրականութեան ամէնէն յայտնի ստեղծագործողներէն մէկը, ան մեծագոյն գնահատականի արժանացած շարք մը վէպերու եւ պատմուածքներու հեղինակ է:

Անոր ամէնէն յայտնի ստեղծագործութիւնն է «Կեցութեան անտանելի թեթեւութիւնը» վէպը: Միլան Քունտերան զայն գրած է 1982 թուականին: Վէպը առաջին անգամ հրատարակուած է 1984-ին:

Իր քաղաքական հայեացքներուն համար Չեխոսլովաքիոյ մէջ հալածանքներու ենթարկուած Քունտերան 1975 տեղափոխուած է Ֆրանսա եւ տարիներ անց սկսած է ֆրանսերէն գրել:

Արտասահման մեկնելէ ետք ան Չեխիա չէ վերադարձած եւ արգելած է իր ստեղծագործութիւնները հրատարակել Չեխիոյ մէջ:

2019 թուականին Քունտերան Չեխիոյ վարչապետ Անտրէյ Պապիշի առաջարկով վերականգնած է քաղաքացիութիւնը, որմէ տասնամեակներ առաջ զրկուած էր Չեխոսլովաքիոյ համայնավար ղեկավարներուն վճիռով:

Աղբիւրը` Ազդակ