Ռայի Պատրիարք. «Լիբանանի քաղաքական անձնաւորութիւնները նախագահ պիտի չկարենան ընտրել, եթէ հոգեւոր եւ բարոյական արժէքներով չփայլին»

Մար Շարպելի տօնին առիթով, մարոնի համայնքի Պշարա Ռայի պատրիարքը անցեալ շաբաթ օր Ս. պատարագ մատուցեց Պքաաքաֆրայի Մար Հաուշապ վանքին մէջ:

Իր քարոզին մէջ, Ռայի պատրիարքը յայտնեց, որ Լիբանան եւ անոր շրջանակները կարիքը ունին քրիստոնեաներու, որոնք քաղաքական եւ դատական կեանքին մէջ կը փայլին:

Ան դիտել տուաւ, որ Լիբանանի քաղաքական անձնաւորութիւնները հանրապետութեան նախագահ պիտի չկարենան ընտրել, եթէ հոգեւոր եւ բարոյական արժէքներով չփայլին: Ռայի պատրիարքը նշեց, որ միայն այդ արժէքներուն շնորհիւ կարելի պիտի ըլլայ սահմանադրական հաստատութիւնները կեանքի կոչել եւ աղքատ ու տառապած ժողովուրդին օդանդակել:

«Կ՛աղօթենք առ Աստուած, որ բոլորը արձակէ իրենց շահերէն եւ քանդիչ ծրագիրներէն», ըսաւ Ռայի պատրիարքը:

Նշենք, որ Ռայի պատրիարքը երէկ Տիմանի մէջ նախագահեց կիրակի օրուան Ս. պատարագին, որուն մէջ շեշտեց, թէ Աստուծոյ թաքուն ձեռքով է, որ Լիբանան կը փրկուի քանդումէ եւ ամբողջական քայքայումէ:

Միւս կողմէ, Ռայի պատրիարքը Պքաաքաֆրայի մէջ հանդիպում մը ունեցաւ Լիբանանեան ուժեր կուսակցութեան ղեկավար Սամիր Ժահժահի հետ:

Հանդիպումին ընթացքին Ժահժահ ցաւ յայտնեց Քըրնեթ Սաուտայի միջադէպին շուրջ բացուած հետաքննութեան գծով արձանագրուած միջամտութիւններուն համար:

Սուրիացի տեղահանուածները Լիբանանի մէջ պահելու Եւրոպական խորհրդարանի որոշումին առումով Ժահժահ նշեց, որ այդ խորհրդարանի որոշումները գործադրելու իմաստով Լիբանան յանձնառութիւն չունի:

Աղբիւրը՝ Ազդակ