Հայկական ժողովրդական երգեր. «Կարմի ֆըստան» պարերգը
«Կարմի ֆըստան» պարերգի մասին Դանիէլ Երաժիշտը պատմեց. «Այս երգը Վերժինէ Սվազլեանի աշխատութեան միջից եմ վերցրել, բայց կատարելուց առաջ ես և մեր անսամբլից Հրաչիկ Գրիգորեանը գնացինք Մուսա լեռ գիւղը՝ Էջմիածնի ճանապարհին, և էնտեղ մենք հարցուփորձ արեցինք, մի տատիկ գտանք: Այս երգը բոլորը գիտեն, բայց էդ տատիկն էնպիսի բաներ պատմեց, որ մենք նախ զարմացանք, յետոյ հասկացանք, որ ամեն մի վկայութիւն, թէկուզ իր զրոյցը տեղի բարբառով պատմական յիշողութիւնը խթանող բաներ են և մեզ աւելի օգնում են՝ այդ երգի միջավայրը վերստեղծելու: Նա երգեց նաև մեզ համար այդ երգը:
Առաջին տան միտքն այս է՝ Պայծառ ամպերի տակ աղջիկը պառկած քնած է, կարմիր զգեստ է հագած, ինչքան էլ վայելած է, սազել է: Յետոյ մի աղջիկ ասում է՝ Տղայ, անունդ Խորեն, ձէնդ գալիս է ախոռէն: Տղան էլ ասում է՝ Աղջիկ, անունդ Շուշան, արի գնանք մեր կողմերը, մատանի կտամ քեզ՝ նշան: Շուշանն էլ ասում է՝ Արի գնանք սարի լանջը, նայենք մէկմէկու սիրտը, այսինքն՝ իրար լաւ ճանաչենք, համոզուենք, թէ ինչքան ենք իրար սիրում, նոր նշան տուր: Յետոյ ասում է՝ Տղայ, անունդ Թումաս, ինչո՞ւ կերար իմ տոլմաս: Մեր Գէորգ Հաճեանը ծագումով կիլիկեցի է և տիրապետում է այս բարբառին: Իր միայն արտասանութիւնն արդեն հրաշալի է, ես սա համարում եմ երգ՝ երգի մէջ»:
Երգը ներկայացուած է հնագոյն երաժշտութեան «Շարական» անսամբլի կատարմամբ։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ