Հայաստանը եւ Ազրպէյճանը Համաձայնած են սահմանազատումը իրականացնել Հիւսիսէն Հարաւ
Երէկ Հայաստանի եւ Ազրպէյճանի սահմանին վրայ տեղի ունեցած է երկու երկիրներուն միջեւ պետական սահմանի սահմանազատման եւ սահմանային անվտանգութեան հարցերով յանձնախումբի եւ պետական սահմանի սահմանազատման պետական յանձնախումբի 11-րդ հանդիպումը` փոխվարչապետներ Մհեր Գրիգորեանի եւ Շահին Մուստաֆայեւի նախագահութեամբ, կը հաղորդէ Հայաստանի արտաքին գործոց նախարարութիւնը:
«Հանդիպման ընթացքին կողմերը շարունակած են միտքերու փոխանակումը սահմանազատման աշխատանքներու հետագայ իրականացման համար սահմանագիծի հատուածներու/հատուածամասերու հերթականութեան հարցի շուրջ եւ համաձայնութեան եկած են սկսելու պետական սահմանի սահմանազատման համալիր աշխատանքները հիւսիսային հատուածէն` Հայաստանի Հանրապետութեան, Ազրպէյճանի Հանրապետութեան եւ Վրաստանի սահմաններու հատման կէտէն եւ այնուհետեւ հարաւային ուղղութեամբ` հիւսիսէն հարաւ մինչեւ Հայաստանի Հանրապետութեան եւ Ազրպէյճանի Հանրապետութեան սահմանը Իրանի Իսլամական Հանրապետութեան հետ», նշուած է պաշտօնական հաղորդագրութեան մէջ:
Կողմերը քննարկած են սահմանազատման աշխատանքներու իրականացման կարգին վերաբերեալ համապատասխան ուղեցոյցներու նախագիծերը, պայմանաւորուած են աշխատանքային կարգով համաձայնեցնել յաջորդ հանդիպման կայացման ամսաթիւն ու վայրը:
Աղբիւրը՝ Ազդակ
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
