ԵՄ Ազրպէյճանին կոչ կ՛ուղղէ անյապաղ հետաքննելու Պաքուի մէջ պահուող հայերուն նկատմամբ վատ վերաբերմունքի մասին մեղադրանքները
Ազրպէյճանը կալանքի մէջ պահուող հայերու համար պէտք է ապահովէ արդար դատաքննութեան իրաւունքը եւ բաւարար պայմաններ` համաձայն իր միջազգային պարտաւորութիւններուն: Պրիւքսելի մէջ «Արմէնփրես»-ի թղթակիցի հարցումին ի պատասխան` այս մասին ըսած է Եւրոպական Միութեան եւ անվտանգութեան հարցերով բանբեր Անիթա Հիփեր:
Ան ընդգծած է, թէ շատ կարեւոր է, որ ենթադրեալ զինուորական յանցագործութիւնները եւ այլ իրաւախախտումները հետաքննուին թափանցիկ կերպով:
«Մենք տեղեակ ենք, որ Հայաստանի կառավարութիւնն ու շարք մը իրաւապաշտպան կազմակերպութիւններ մտահոգութիւններ յայտնած են մեղադրեալներու նկատմամբ վերաբերմունքի վերաբերեալ: Մենք այս մտահոգութիւնները շատ լուրջ կ՛ընդունինք եւ ուշադիր կը հետեւինք զարգացումներուն: Ազրպէյճանի իշխանութիւնները պէտք է անյապաղ եւ անաչառ կերպով հետաքննեն վատ վերաբերմունքի վերաբերեալ բոլոր մեղադրանքները, եւ եթէ անոնք հաստատուին, ապա պէտք է պատասխանատուութեան ենթարկեն մեղաւորները:
«Պաքուի զինուորական դատարանին մէջ ընթացող դատավարութիւնները կ՛առնչուին շատ աւելի լայն` Հայաստանի եւ Ազրպէյճանի միջեւ կայուն ու տեւական խաղաղութեան հաստատման հարցին: Ուստի, մենք կը շարունակենք Հայաստանին եւ Ազրպէյճանին կոչ ուղղել` յենելու արդէն իսկ ձեռք բերուած յաջողութիւններուն վրայ եւ շարունակելու յառաջընթացը յարաբերութիւններու լիարժէք կարգաւորման ուղղութեամբ», ըսած է Եւրոպական Միութեան արտաքին յարաբերութիւններու եւ անվտանգութեան հարցերու բանբեր Անիթա Հիփեր, եւ աւելցուցած, որ Եւրոպական Միութիւնը պիտի շարունակէ աջակցիլ այս հոլովոյթին իր ամբողջ գործիքակազմով:
Աղբիւրը` Ազդակ
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
