2 Ապրիլին Պելճիքայի դաշնակցային խորհրդարանին մէջ լսումներ` Արցախի վերաբերեալ բանաձեւի նախագիծի շուրջ

Պելճիքայի դաշնակցային խորհրդարանի արտաքին յարաբերութիւններու յանձնախումբին նախաձեռնութեամբ 2 ապրիլին տեղի պիտի ունենան Արցախի վերաբերեալ բանաձեւի նախագիծի շուրջ լսումներ:

Պրիւքսելի մէջ «Արմէնփրես»-ի թղթակիցին հաղորդումով` բանաձեւի նախագիծը ամիսներ առաջ առաջարկուած է դաշնակցային պատգամաւորներ Էլս Վան Հուֆի եւ Միշել տը Մայեկտի կողմէ:

Բանաձեւի նախագիծը ներկայացուցած պելճիքացի դաշնակցային երեսփոխան Էլս Վան Հուֆ «Արմէնփրես»-ի թղթակիցին հետ զրոյցի ընթացքին նշած է, թէ շատ կարեւոր կը նկատէ այն փաստը, որ Պելճիքան աջակցի Հայաստանին` երկրի մը, որ կը կիսէ ժողովրդավարութեան, օրէնքի գերակայութեան եւ միջազգային օրէնքի նկատմամբ յարգանքի նոյն արժէքները:

«Ես խորապէս ցնցուած էի Լաչինի միջանցքի շրջափակումէն, Ազրպէյճանի հետագայ յարձակումէն ընդդէմ Արցախի ժողովուրդին եւ Ազրպէյճանի շարունակական յարձակողական հռետորաբանութենէն` ընդդէմ Հայաստանի:

«Պելճիքան եւ Եւրոպան պէտք է ճնշում գործադրեն Ազրպէյճանի վրայ, որպէսզի անիկա լիովին յարգէ Հայաստանի տարածքային ամբողջականութիւնն ու գերիշխանութիւնը եւ անկեղծօրէն աշխատի կայուն խաղաղութեան հաստատման ուղղութեամբ: Եթէ Ազրպէյճանը շարունակէ խախտել միջազգային օրէնքը, անհրաժեշտ է, որ եւրոպական մակարդակի վրայ սահմանափակումներ կիրարկուին, եւ Եւրոպական Միութեան Ազրպէյճանի հետ յարաբերութիւնները վերատեսութեան ենթարկուին: Ասիկա է բանաձեւիս կոչը», ըսած է Էլս Վան Հուֆ:

Միշել տէ Մայեկտ իր կարգին նշած է, որ անընդունելի է, որ հայ գերիները տակաւին անմարդկային պայմաններու մէջ կը պահուին Պաքուի բանտերուն մէջ: Դաշնակցային պատգամաւորը շեշտած է, որ միջազգային ընտանիքը պէտք է գործէ:

«Մենք պէտք է մեր ձայնը բարձրացնենք: Մենք պէտք է կարելի բոլոր միջոցներով ուժեղացնենք Ազրպէյճանի վրայ ճնշումը: Այս հարցը այս շաբաթ կրկին քննարկած եմ արտաքին գործոց նախարարին եւ վարչապետին հետ: Խնդիրը հրատապ է: Այս բանաձեւի առաջարկը ինքնին այս նպատակին կը ծառայէ: Անիկա կառավարութեան կը յորդորէ գործել եւ կիրարկել իր լծակները: Կը պահանջէ Ալիեւի վարչակազմին նկատմամբ պատժամիջոցներ: Ես պիտի մնամ լիովին ներգրաւուած, ինչպէս միշտ, եւ երբեք պիտի չհրաժարիմ այս պայքարէն», ըսած է ան:

Բանաձեւի առաջարկուած նախագիծի առանցքային կէտերու շարքին են արցախահայութեան անվտանգ վերադարձի հարցը, Ազրպէյճանի թշնամական հռետորաբանութիւնը, շրջանին մէջ կայուն խաղաղութեան անհրաժեշտութիւնը, հայ գերիներու ազատումը, հայկական մշակութային ժառանգութեան պաշտպանութիւնն ու բազմաթիւ այլ հարցեր:

Աղբիւրը՝ Ազդակ