Իրանի եւ Իսրայէլի փոխադարձ հարուածները 8-րդ օրն ըլլալով շարունակուցան

Երէկ առաւօտեան Իրանէն արձակուած հրթիռ մը ինկաւ Պիր Սապաայի մէջ` պատճառելով 37 վիրաւորներ: Իսրայէլեան բանակը ընդունեց, որ հրթիռը առանց խոչընդոտի հասած է իր թիրախին, եւ դէպքին շուրջ քննութեան ձեռնարկեց:

Իսրայէլեան պատկերասփիւռի 12-րդ կայանը, մէջբերելով Պիր Սապաայի քաղաքապետութիւնը, հաղորդեց, որ իրանեան հրթիռը ուղղակի կերպով հարուածած է քաղաքին մէջ շէնք մը:

Իրանի պետական ԻՐՆԱ լրատու գործակալութիւնը հաղորդեց, որ հրթիռը հարուածած է Կաֆ Եամ Նեկեւ ճարտարագիտական կեդրոնը, ուր կը գտնուին զինուորական եւ համացանցային աշխուժ հաստատութիւններ:

Զինուորական աղբիւր մը իսրայէլեան բանակի ձայնասփիւռի կայանին յայտնեց, որ իսրայէլեան անօդաչու թռչող սարք մը Թեհրանի մէջ ահաբեկման գործողութեան մը ընթացքին թիրախաւորած է հիւլէական գիտնական մը:

Իրանի Արեւելեան Ազրպէյճան նահանգի նահանգապետ Պահրամ Սարմասթ յայտարարեց, թէ իսրայէլեան յարձակում մը նահանգին մէջ թիրախաւորած է երկու շրջաններ, որոնցմէ մէկը Թաւրիզի օդակայանն է:

«Ֆարս» լրատու գործակալութիւնը, մէջբերելով Իրանի պաշտպանութեան նախարարութիւնը, հաղորդեց, որ Իրանի պաշտպանութեան նախարարութեան պատկանող բոլոր կառոյցները ուժեղ կերպով կը շարունակեն իրենց աշխատանքը, հակառակ զինուորական գործարանները թիրախաւորող յարձակումներուն:

Նախարարութիւնը միեւնոյն ժամանակ նշեց, որ զինեալ ուժերուն մատակարարած է տարիներ շարունակ կռուելու համար անհրաժեշտ բոլոր կարիքները:

Իրանի նախագահ Մասուտ Փեզեշքիան նշեց. «Պատերազմին վերջ տալու միակ ուղին յարձակումին առանց նախապայմանի դադրեցումը եւ սիոնական արկածախնդրութիւններուն վերջ տալու երաշխիքներու տրամադրումն է»:

«Թշնամիին մեր հակադարձութիւնները պիտի դառնան աւելի խիստ եւ զայն պիտի մղեն իր արարքներուն համար զղջալու», շեշտեց Փեզեշքիան:

Իսրայէլի նախագահ Իսհաք Հերցոկ յայտնեց, թէ Իսրայէլ ուղղակի կերպով չի թիրախաւորեր Իրանի գերագոյն հոգեւոր պետ այաթոլլա Ալի Խամենէին, սակայն անոր հեռացումը, ի վերջոյ, իրանցի ժողովուրդի շահերէն կը բխի:

«Խամենէին մեզի համար վերջնական թիրախ չէ, եւ վարչակարգը փոխելու նպատակ չունինք, սակայն ատիկա իրանցի ժողովուրդին համար կրնայ դրական ազդեցութիւն ունեցող պատմական մեծ անուղղակի արդիւնք ըլլալ», նշեց Հերցոկ:

Իսրայէլի նախագահը ըսաւ, որ Թեհրանի մէջ վարչակարգի փոփոխութեան կարելիութիւն կը տեսնէ, սակայն շեշտեց, որ իր երկրին հիմնական նպատակը Իրանի հիւլէական եւ հրթիռային ծրագիրներուն վերջ տալն է:

«Մենք գործ ունինք իրանեան հիւլէական ծրագիրին հետ, եւ ան ընգղայի նմանող վայրագ գոյացութիւն մըն է, որ շարք մը տարրերէ կը բաղկանայ, եւ պէտք է ճշգրտութեամբ քայքայել ու վնասազերծել անոնց կարողութիւնները», նշեց Հերցոկ:

Ինչ կը վերաբերի Միացեալ Նահանգներու տագնապին միջամտութեան կարելիութեան, ան ըսաւ. «Մենք կը յարգենք նախագահ Տանըլտ Թրամփը, եւ կը կարծենք, որ ան ունի իմաստութիւնը, կարողութիւնը եւ կացութեան յստակ հասկացողութիւնը: Իմ կարծիքով` ասիկա հազուադէպ առիթ է վերացնելու սպառնալիք մը, որ աշխարհի հորիզոնին վրայ երեւիլ շարունակեց»:

Հերցոկ յայտնեց, որ Իսրայէլ տակաւին դիւանագիտութեան նկատմամբ դրական տրամադրուած է. «Դիւանագիտութիւնը կրնայ միշտ լուծումին մաս ըլլայ: Երբեք ոչ չենք ըսած»:

«Մենք գիտենք, թէ ի՛նչ պէտք է ընենք, եւ փաստեցինք, թէ գիտենք ինչպէս վարուիլ», յայտարարեց Իսրայէլի նախագահը:

Իսրայէլեան պատկերասփիւռի 15-րդ կայանը երէկ հաղորդեց. «Երէկ տեղի ունեցաւ ամերիկեան-իսրայէլեան առցանց ժողով մը, որուն մասնակցեցան վարչապետ Նեթանիահուն, պաշտպանութեան նախարար Քացը, փոխնախագահ Վանսը եւ պաշտպանութեան նախարար Հեկսեթը»:

Իրանէն արձակուած հրթիռներ երէկ կէսօրէ ետք ինկան Հայֆայի, Ղոշ Տանի եւ Երուսաղէմի մէջ: Հայֆայի մէջ տասնեակներով վիրաւորներ արձանագրուեցան: Իսրայէլեան լրատուամիջոցներ հաղորդեցին, որ հրթիռը ինկած է ներքին գործոց նախարարութեան կեդրոնատեղիին մօտ:

Իրանի գերագոյն հոգեւոր պետ այաթոլլա Ալի Խամենէի իր պաշտօնական կայքին վրայ գրառում մը կատարելով յայտնեց. «Սիոնական թշնամին իր պատիժը կը կրէ, հիմա իր պատիժը կը կրէ»:

Իսրայէլեան լրատուամիջոցներ երէկ կէսօրէ ետք հաղորդեցին, թէ իսրայէլեան օդուժը յարձակում գործեց Պուշահր հիւլէական կայանին վրայ:

Աղբիւրը` Ազդակ