Մշակոյթի նախարար Ղասսան Սալամէի «Լիբանանը կեդրոն ինքնութեան եւ շրջանի կերպարանափոխութիւնը» նիւթով դասախօսութիւն

Լիբանանի մշակոյթի նախարար Ղասսան Սալամէ յատուկ դասախօսութիւն մը տուաւ 26 յունիս 2025-ին, Պէյրութի հայ կաթողիկէ Սուրբ Գրիգոր Լուսաւորիչ եւ Սուրբ Եղիա աթոռանիստ եկեղեցւոյ մէջ` «Լիբանանը` ինքնութիւն եւ շրջանային կերպարանափոխութիւն» խորագիրով: Այս նախաձեռնութիւնը մաս կը կազմէ եկեղեցւոյ կողմէ 2025-2026 տարուան ընթացքին կազմակերպուած գործունէութիւններուն, որոնք կը կրեն «Խաղաղութիւն եւ արդարութիւն» բնաբանը:

Ղ. Սալամէ լուսարձակի տակ առաւ Միջին Արեւելքի մէջ տեղի ունեցող աշխարհաքաղաքական փոխակերպումներուն լոյսին տակ յառաջացած մարտահրաւէրները: Ան վերլուծեց տարածաշրջանային մեծ ուժերուն միջեւ ծաւալած մրցակցութիւնը` թէ՛ ռազմական գերիշխանութեան, թէ՛ աւելի քաղաքական մակարդակի վրայ թափանցող տիրակալութեան միջոցով:

Նախարարը ապա անդրադարձաւ ինքնութեան նուրբ հարցին` իբրեւ ձեռք բերուած, սակայն անփոփոխելի չեղող գիծի մը: Թէեւ 20-րդ դարուն կրօնական գաղափարախօսութիւնները գերակշռեցին, բայց եւ այնպէս, ժամանակի ընթացքին անոնք իրենց տեղը զիջեցան նոր ուղենշանի մը` ինքնութեան, որ կրնայ աւելի ջերմեռանդ կերպով շարժման մէջ դնել ժողովուրդներ, քան` գաղափարախօսութիւնը: Ղ. Սալամէ շեշտեց, որ իւրաքանչիւր անհատ ազատ է վերադասաւորելու իր ինքնութիւնը` վերարժեւորելով իր բաղադրիչները, ինչպիսիք են կրօնը կամ ծագումը: Լիբանանի պարագային, համայնքային պատկանելիութիւնը կրնայ ապահովութիւն տալ, բայց նաեւ` թակարդի վերածուիլ ու փակել մարդը, եթէ ան բաց չէ երկրի միւս համայնքներէն եկող հարստութեան, դիտել տուաւ ան:

Դասախօսութեան աւարտին նախարար Սալամէն կոչ ուղղեց համաժողովրդական մտածումի մը` հայրենասիրական գիծի շուրջ, որ կրնայ փրկարար դեր ունենալ Լիբանանի բարդ պայմաններուն մէջ:

Դասախօսութեան աւարտին մասնակիցները իրենց հարցումները ուղղեցին նախարարին ու ունեցան երկխօսութեան կարելիութիւն:

Աղբիւրը՝ Ազդակ