Զիատ Ռահպանի մահուան ի լուր Բագրատունիի գրառումը
Հայկական երեսփոխանական պլոքի ներկայացուցիչ, երեսփոխան Յակոբ Բագրատունի լիբանանցի հռչակաւոր արուեստագէտ Զիատ Ռահպանիի մահուան առիթով Դիմատետրի իր էջին վրայ կատարեց հետեւեալ գրառումը.
«Հսկաները չեն մահանար, այլ անոնց հոգիները մեր մէջ կ՛ապրին:
«Դիմադրող ու հայրենասէր հոգիդ յաւիտեանս կենդանի պիտի մնայ Լիբանանի փողոցներուն մէջ»:
Արդարեւ Լիբանանցի հռչակաւոր արուեստագէտ Զիատ Ռահպանի անցեալ շաբաթ օր` 26 Յուլիսին մահացաւ 69 տարեկանին:
Ան ծնած էր 1 յունուար 1956-ին, Անթիլիասի մէջ, եւ անդամ եղած է ականաւոր արուեստագէտ ընտանիքի: Անոր հայրը երգահան Ասի Ռահպանին է, իսկ մայրը` աշխարհահռչակ երգչուհի Ֆէյրուզը:
Զիատ Ռահպանի իր արուեստի ասպարէզին սկսած է փոքր տարիքէն: Ան 17 տարեկանին յօրինած է «Սաըալունի Նաս» երգը, որ անոր մայրը` Ֆէյրուզը երգած է 1973 թուականին: Ան նոյն տարին գրած եւ բեմադրած է իր առաջին թատրոնը, որմէ ետք ընթացք առաւ անոր թատերական ծրագիրը, որ կը յատկանշուէր ուղղակի խօսքով եւ քաղաքական ու ընկերային յստակ քննադատութեամբ:
Անոր ամէնէն հռչակաւոր երգերէն են «Պոսթա»-ն, «Քիֆաք Ընթա»-ն, «Ատտեշ քան ֆի նաս»-ը եւ «Նաթարունա»-ն:
Աղբիւրը` Ազդակ
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
