«Սահմաններից այն կողմ». Շեր – Հայուհին, ով դարձաւ փոփ երաժշտութեան դէմքը

Այսօր պատմելու ենք մի արտիստի մասին, ով ո՛չ միայն փոփ երաժշտութեան իրական պատկերակ է, այլեւ կին, որ տարիներ շարունակ կոտրել է սահմանափակումները՝ թէ՛ ձայնային արուեստում, թէ՛ կինոյում, թէ՛ հասարակական ընկալումներում։

Նա ամերիկեան փոփ մշակոյթի ամենավար և համարձակ դէմքերից մէկն է։ Նրա անունն է՝ Շեր։

Շերը ծնուել է 1946 թուականին՝ Քերիլին Սարգսեան անունով՝ Կալիֆորնիայում։ Նրա հայրը՝ Ղարիբ Սարգսեանը, ծագումով հայ էր՝ Մեծ Եղեռնի վերապրածների ժառանգ, իսկ մայրը՝ Ջորջիա Հոլտը, ունէր գերմանական, անգլիական և չերոկի արմատներ։ Հայրն իր կեանքում մեծ դեր չէր խաղացել, բայց հայկական ծագումն ու ազգանունը Շերը երբեք չէր թաքցրել։ Նա յաճախ է հարցազրոյցներում յիշեցրել իր հայկական արմատների մասին՝ հպարտութեամբ։

«Ես զգում եմ իմ մէջ ուժեղ, կրակոտ բան՝ որը ես անվանում եմ հայկական ոգի», – մի անգամ ասել է նա։

Շերի կարիերան սկսուեց 1960-ականներին իր ամուսնու՝ Սոնի Բոնոյի հետ, երբ նրանք դարձան հանրայայտ դուետ՝ Sonny & Cher։ Նրանց «I Got You Babe» երգը դարձաւ փոփ երաժշտութեան պատմութեան դասականներից մէկը։

Աւելի ուշ Շերը սկսեց մենակատար կարիերա, որը դարձաւ նոր փուլ։ Նրա երգերը՝ «Believe», «Strong Enough», «If I Could Turn Back Time», ոչ միայն հիթեր դարձան, այլ վերածուեցին սիմվոլների՝ ուժեղ, ինքնուրոյն, անկախ կնոջ կերպարի համար։

Նա նաև կինոյի աշխարհ մուտք գործեց։ 1988 թուականին Շերը ստացաւ Օսկար՝ «Լուսնալույսի կախարդանքը» ֆիլմում կատարած դերի համար։

Շերը երբեք չէր համապատասխանում ստանդարտ պատկերացումներին։ Նա կոտրեց շատ սեռային, սոցիալական ու երաժշտական սահմաններ՝ դառնալով նաև ֆեմինիստական շարժման մի իւրայատուկ խորհրդանիշ։ 70-80 տարեկանում նա շարունակում է համերգներ տալ, նորաձեւութեան աշխարհում յայտնուել, և խօսել հասարակական ու քաղաքական կարևոր հարցերի մասին։

Նրա կեանքի պատմութիւնը ոգեշնչում է՝ յաղթահարել աղքատութիւնը, ընտանեկան խզումները, առողջական դժուարութիւնները։ Եւ նրա իւրաքանչիւր քայլ կարծես պատգամ է՝ քո ինքնութիւնը երբեք մի ուրացիր։

Չնայած մեծացել է արևմտեան մշակոյթում, Շերը միշտ յիշել է իր հայ արմատների մասին։ Հայոց ցեղասպանութեան 100-ամեակի կապակցութեամբ նա գրել էր․

«Մեր ընտանեկան պատմութիւնը նոյնպէս սկսւում է ցեղասպանութիւնից փրկուած հայ պապիկից։ Ես հպարտ եմ, որ հայ եմ»։

Նա աջակցել է նաև Հայ դատին՝ հանդէս գալով Հայոց ցեղասպանութեան ճանաչման օգտին։

Շերը՝ Քերիլին Սարգսեանը, ոչ միայն փոփ աստղ է։ Նա ապրող լեգենդ է, հայկական ժառանգութեան կրող, կին, որ ոգեշնչում է միլիոնաւոր մարդկանց աշխարհի բոլոր անկիւններում։

Նա ցոյց տուեց, որ կարելի է լինել համաշխարհային՝ առանց մոռանալու, թէ որտեղից ես։

Շերի պատմութիւնը ապացուցում է՝ իսկական արուեստն ու արմատները երբեք չեն մարում։

 Ռուզաննա Պետրոսեան