Պելճիքան պիտի ճանչնայ պաղեստինի պետութիւնը

Պելճիքայի արտաքին գործոց նախարար Մաքսիմ Փրեւօ երէկ յայտարարեց, թէ իր երկիրը 9-23 սեպտեմբերի ընթացքին Նիւ Եորքի մէջ գումարուող ՄԱԿ-ի Ընդհանուր ժողովի ընթացքին պիտի ճանչնայ Պաղեստինի պետութիւնը եւ Իսրայէլի դէմ «խիստ պատժամիջոցներ» պիտի հաստատէ:

Նշենք, որ Ֆրանսայի նախագահ Էմանուել Մաքրոն յուլիսին յայտարարեց, թէ իր երկիրը ՄԱԿ-ի Ընդհանուր ժողովի ընթացքին պիտի ճանչնայ Պաղեստինի պետութիւնը: 12 այլ պետութիւններ, ներառեալ Աւստրալիան, Բրիտանիան եւ Քանատան իրենց կարգին յայտարարեցին, թէ պիտի ճանչնան Պաղեստինի պետութիւնը:

Անտորան, Ֆինլանտան, Իսլանտան, Իրլանտան, Լիւքսամպուրկը, Մալթան, Նոր Զելանտան, Նորվեկիան, Փորթուգալը, Սան Մարինոն, Սլովաքիան ու Սպանիան ստորագրեցին այսպէս կոչուած «Նիւ Եորքի հռչակագիր»-ը:

Փրեւօ ըսաւ, որ Պելճիքան անոնց պիտի միանայ, ինչ որ ճամբան կը հարթէ երկու պետութիւններու սկզբունքին հիմամբ լուծման:

Պելճիքական դիւանագիտութեան պետը նաեւ նշեց, թէ իր երկիրը Իսրայէլի դէմ պիտի հաստատէ 12 «խիստ» պատժամիջոցներ, ինչպէս անոր բնակեցման վայրերէն ներածման արգիլումը եւ իսրայէլեան ընկերութիւններէ ընդհանուր գնումներու քաղաքականութեան վերատեսութեան ենթարկումը:

Աղբիւրը՝ Ազդակ