Պոլսոյ հայկական գերեզմանատան մէջ` վանտալիզմի դէպք

Պոլսոյ Սկիւտար շրջանի Պաղլարպաշը թաղամասի Սուրբ Կարապետ եկեղեցւոյ թաղային խորհուրդը տեղեկացուցած է, որ 7-8 յուլիսի լուսցող գիշերը անձ մը գերեզմանատուն մուտք գործելով վնասած է վեց դամբարան եւ աղբիւր մը: «Ազատութիւն» ձայնասփիւռի կայանը կը հաղորդէ, որ այս մասին կը հաղորդէ Պոլսոյ Հայոց պատրիարքութիւնը:

«Դէպքը խորապէս վիրաւորած է համայնքի անդամները, մասնաւորաբար անոնք, որոնց սիրելիներու դամբարանները կը գտնուին սոյն գերեզմանատան մէջ», նշուած է հաղորդագրութեան մէջ:

Թաղային խորհուրդը անմիջապէս դիմած է անվտանգութեան պատկան մարմիններուն, որոնք ձեռնարկած են շտապ քայլերու այդ արարքի հեղինակի ինքնութիւնը բացայայտելու եւ զայն պատասխանատուութեան ենթարկելու համար:

Դատապարտելով այդ յարձակումը` պատրիարքութիւնը շնորհակալութիւն կը յայտնէ անվտանգութեան պաշտօնատարներուն, որոնք «դէպքը բացայայտելու նպատակով իրենց գործունէութիւնը կը շարունակեն խղճմտութեամբ եւ մեծ զգայնութեամբ», եւ յոյս կը յայտնէ, որ յանցագործը պիտի յանձնուի արդարադատութեան:

«Պատրիարքական աթոռը մօտէն կը հետեւի դէպքին վերաբերող բոլոր զարգացումներուն», նշուած է հաղորդագրութեան մէջ:

«Էրմենի Հապեր» կը հաղորդէ, որ Պոլսոյ գլխաւոր դատախազութիւնը յայտարարած է, թէ իրաւապահ մարմիններուն տրուած յանձնարարականներուն հիմամբ իբրեւ կասկածելի ճանչցուած է Մ.Կ.-ն: Ան կալանաւորուած է 48 ժամը չամբողջացած` 9 յուլիս 2026-ին:

Յայտարարութեան մէջ կը նշուի, որ կասկածելին 10 յուլիս 2026-ին բերման ենթարկուած է Պոլսոյ գլխաւոր դատախազութիւն, ապա կալանքի միջնորդութեամբ վերջինիս ուղարկած են դատարան:

Աղբիւրը՝ Ազդակ