ር.ሊ.ጳ ፍራንቸስኮስ ሥር መሰረቶቻችንን ሳንዘነጋ የሰው ልጅ የሚገናኝበትን ድልድይ እንገንባ አሉ!
የእዚህ ዝግጅት አቅራቢ መብራቱ ኃ/ጊዮርጊስ ቫቲካን
በእለቱ የተነበበው የእግዚአብሔር ቃል
የጌታችን የኢየሱስ ክርስቶስ አባትና አምላክ ይባረክ፤ እርሱ ከታላቅ ምሕረቱ የተነሣ በኢየሱስ ክርስቶስ ከሞት መነሣት ምክንያት ለሕያው ተስፋ በሚሆን አዲስ ልደት፣ እንዲሁም በሰማይ ለማይጠፋ፣ ለማይበላሽና ለማይለወጥ ርስት እንደ ገና ወለደን። አሁን በብዙ ዐይነት ፈተና ውስጥ ሆናችሁ ለጥቂት ጊዜ መከራን ብትቀበሉም እንኳ በዚህ እጅግ ደስ ይላችኋል። እነዚህ ነገሮች በእናንተ ላይ የደረሱት፣ በእሳት ተፈትኖ ቢጠራም፣ ጠፊ ከሆነው ወርቅ ይልቅ እጅግ የከበረው እምነታችሁ፣ እውነተኛ መሆኑ እንዲረጋገጥና ኢየሱስ ክርስቶስ በሚገለጥበት ጊዜ ምስጋናን፣ ክብርንና ውዳሴን እንዲያስገኝላችሁ ነው (1ኛ ጴጥሮስ 1. 3.4a.6-7)
ክቡራን እና ክቡራት የዝግጅቶቻን ተከታታዮች ርዕሰ ሊቃነ ጳጳሳት ፍራንቸስኮስ በወቅቱ ያደረጉትን የጠቅላላ የትምህርተ ክርስቶስ አስተምህሮ ሙሉ ይዘቱን እንደሚከተለው አሰንድተነዋል፣ ተከታተሉን።
የተወደዳችሁ ወንድሞቼ እና እህቶቼ እንደምን አረፈዳችሁ!
ከሶስት ቀናት በፊት ወደ ሃንጋሪ ካደረኩት ጉዞ ተመለስኩ። ይህንን ጉብኝት ያዘጋጁትን እና በጸሎት ያጀቡትን ሁሉ ላመሰግናቸው እፈልጋለሁ፣ እናም ለባለሥልጣናት፣ ለአጥቢያ ቤተ ክርስቲያን እና ለሀንጋሪ ሕዝብ፣ ደፋር፣ የማስታወስ ችሎታ ያለው ሕዝብ ምስጋናዬን ለማደስ እፈልጋለሁ። በቡዳፔስት በነበረኝ ቆይታ የሁሉም ሃንጋሪያን ፍቅር ሊሰማኝ ችያለሁ። ዛሬ ስለዚህ ጉብኝት በሁለት ምስሎች ማለትም ሥሮች እና ድልድዮች ልነግርዎ እፈልጋለሁ።
ሥሮች! ቅዱስ ዮሐንስ ጳውሎስ ዳግማዊ እንደተናገሩት—“በብዙ ቅዱሳን እና ጀግኖች፣ በትሑታን እና ታታሪ ሰዎች የተከበቡ” ወደ ነበሩበት ሕዝብ እንደ መንፈሳዊ ነጋዲ ሆኜ ሄጄ ነበር ይህም እውነት ነው፤ ብዙ ትሁት እና ታታሪ ሰዎች ከሥሮቻቸው ጋር ያለውን ትስስር በኩራት ሲመለከቱ አይቻለሁ። ከእነዚህም ሥረ መሠረቱ፣ ከአጥቢያ ቤተ ክርስቲያንና ከወጣቶች ጋር በተደረጉት ስብሰባዎች ላይ የሰጡት ምስክርነቶች፣ በመጀመሪያ ደረጃ ቅዱሳን አሉ፡- ስለ ሕዝብ ሕይወታቸውን የሰጡ ቅዱሳን፣ የፍቅርን ወንጌል የመሰከሩ ቅዱሳን ናቸው። በጨለማ ጊዜ ብርሃን የሆኑ ቅዱሳን፣ ክርስቶስ የወደፊት ህይወታችን መሆኑን በማስታወስ የሽንፈትን እና የነገን ፍራቻ እንድናሸንፍ ዛሬ የሚመክሩን ያለፉት ብዙ ቅዱሳን ናቸው።
ይሁን እንጂ የሃንጋሪ ሕዝብ ጠንካራ የክርስትና ሥሮቻቸው ተፈትነዋል። በእግዚአብሔር ቃል እንደሰማነው እምነታቸው በእሳት ተፈትኗል። በእርግጥም በ20ኛው መቶ ክፍለ ዘመን አምላክ የለሽ በሆኑ ሰዎች የተነሳ ስደት በደረሰበት ወቅት ክርስቲያኖች ጳጳሳት፣ ቀሳውስት፣ ገዳማዊያን/ገዳማዊያት እና ምእመናን ተገድለዋል ወይም ነፃነታቸውን ተነፍገው በኃይል ተመትተዋል። ነገር ግን የእምነትን ዛፍ ለመቁረጥ እየተሞከረ ሳለ ሥሩ ሳይበላሽ ቀርቷል፡ የተደበቀች ቤተ ክርስቲያን ጸንታለች፣ ብዙ ቀሳውስት በድብቅ የተሾሙ፣ በፋብሪካ ውስጥ በመስራት ወንጌልን የመሰከሩ፣ አያቶች ደግሞ ተደብቀው ወንጌልን እየሰበኩ ነበር። በሃንጋሪ ይህ የኮሚኒስት ጭቆና በፊት የናዚ ጭቆና ነበር፣ ብዙ የአይሁድ ህዝብ በአሳዛኝ ሁኔታ በግዞት ላይ ነበር። ነገር ግን በዚያ አሰቃቂ የዘር ማጥፋት ወንጀል ብዙዎች ራሳቸውን በመቃወም እና ተጎጂዎችን ለመጠበቅ ባላቸው ችሎታ ተለይተዋል፤ እናም ይህ ሊሆን የቻለው አብሮ የመኖር ሥሩ ጠንካራ ስለነበረ ነው። ስለዚህ የእምነት እና የሰዎች የጋራ ትስስር የነፃነት መመለስን ረድቷል።
ግን ዛሬም ከወጣቶች እና ከባህል አለም ጋር በተደረጉ ስብሰባዎች እንደታየው ነፃነት ስጋት ላይ ነው። እንዴት? ከሁሉም በላይ በአሳሳች ፖሊሲዎች፣ በሸማችነት ፣ በማደንዘዣ ፣ በትንሽ ቁሳዊ ደህንነት ረክቶ መቆየት ፣ ያለፈውን በመርሳት ፣ ለግለሰቡ መመዘኛ በተሰራ ስጦታ አንድ ሰው “ይንሳፈፋል”። ነገር ግን ዋናው ነገር ስለራስ ማሰብ እና የወደደውን ሲሰራ ሥሩ ይታነቃል። ይህ በመላው አውሮፓ ያለ ችግር ነው፣ እራስን ለሌሎች መስጠት፣ ማህበረሰብ መሰማት፣ አብሮ የማለም ውበት እና ትልልቅ ቤተሰቦችን መፍጠር በችግር ውስጥ ናቸው። ስለዚህ ሥሮቹን የመጠበቅን አስፈላጊነት እናሰላስል፣ ምክንያቱም ወደ ጥልቀት በመሄድ ብቻ ቅርንጫፎቹ ወደ ላይ ያድጋሉ እና ፍሬ ያፈራሉ። እስቲ እራሳችንን እንጠይቅ፣ በህይወቴ ውስጥ በጣም አስፈላጊ የሆኑት ነገሮች ምንድናቸው? አስታውሳቸዋለሁ ወይ ፣ ይንከባከባቸዋለው ወይ?
ከሥሮቹ በኋላ ሁለተኛው ምስል ይመጣል፣ ድልድዮች። ከዛሬ 150 አመት በፊት ከሶስት ከተሞች ህብረት የተወለደችው ቡዳፔስት እሷን አቋርጠው በሚሄዱት ድልድዮች ዝነኛ ነች። ይህ በተለይ ከባለሥልጣናት ጋር በተደረጉ ስብሰባዎች በተለያዩ ህዝቦች መካከል የሰላም ድልድይ ግንባታ አስፈላጊነትን አስታውሷል። ይህ በተለይ “የሰላም ድልድይ” ተብሎ የሚጠራው የአውሮፓ ጥሪ ልዩነቶችን በማካተት በሯን የሚያንኳኩ ሰዎችን ለመቀበል ነው። ከዚህ አንፃር የሀንጋሪ ቤተክርስትያን ታላቅ የበጎ አድራጎት መረብ እያደነኩ ላገኛቸው የቻልኩት ከጎረቤት ዩክሬን ለሚመጡ ስደተኞች የፈጠረው የሰብአዊ ድልድይ ውብ ነው።
ሀገሪቱ "ለነገ ድልድይ" ለመገንባት በጣም ቁርጠኛ ነች፡ ለሥነ-ምህዳር እንክብካቤ እና ለዘላቂነት ትልቅ ስጋት አለ፣ በትውልዱ መካከል፣ በአረጋውያንና በወጣቶች መካከል ድልድይ ለመፍጠር እየተሰራ ነው፣ ይህ በማንም ሊተው የማይችል ተግዳሮት ነው። የክርስቶስ አዋጅ ያለፈውን በመድገም ብቻ ሳይሆን ሁል ጊዜም መሻሻል ስላለበት ማኅበረ ቅዱሳን በስብሰባ ላይ እንደተገለጸው ለዘመናችን ሰዎች እንድትዘረጋ የተጠራችባቸው የዘመናችን ሴቶች እና ወንዶች ኢየሱስን እንደገና ለማግኘት የምትረዳ ድልድዮችም አሉ። እናም በመጨረሻም በአመስጋኝነት ያማረውን የስርዓተ አምልኮ ጊዜያት ፣ከግሪክ ካቶሊክ ማህበረሰብ ጋር የተደረገውን ጸሎት እና በድምቀት የተከበረውን የቅዱስ ቁርባን በአል በማስታወስ ፣በአማኞች መካከል ድልድይ የመገንባትን ውበት አስባለሁ፡እሁድ በቅዳሴ ላይ የተለያዩ ክርስቲያኖች ነበሩ። በሃንጋሪ ውስጥ በደንብ አብረው የሚሰሩ የአምልኮ ሥርዓቶች እና ሀገሮች እና የተለያዩ ቤተ እምነቶች አሉ። ድልድዮች መገንባት ያስፈልጋል። እራሳችንን እንጠይቅ፡ እኔ በቤተሰቤ፣ በደብሬ፣ በማህበረሰቤ፣ በአገሬ ድልድይ፣ ስምምነት፣ አንድነት ገንቢ ነኝ ወይ?
በዚህ ጉብኝት፣ የሀንጋሪ ባህል ባህሪ በሆነው በሙዚቃ አስፈላጊነት ተደንቄያለሁ። ሙዚቃ በየቦታው ነበር፡ ኦርጋን፣ ፒያኖ፣ ቫዮሊን፣ ብዙ መሳሪያዎች እና ብዙ ዘፈኖች እና መዝሙሮች ነበሩ። አካል ጉዳተኞች “ዜማ ለዘላለም ይኑር!” በማለት ዘፈኑ፣ ትርጉሙም፡- ረጅም ተስማምቶ የመኖር ስሜት ይኑራችሁ፣ ወንድማማችነት ይንገስ፣ ለሕይወት ተስፋን እና ደስታን የሚሰጥ ሙዚቃ ነው!
በመጨረሻም፣ በግንቦት ወር መጀመሪያ ላይ ሃንጋራዊያን ለአምላክ እናት ምን ያህል ያደሩ እንደሆኑ ማስታወስ እፈልጋለሁ። በቀዳማዊው ንጉሥ በቅዱስ እስጢፋኖስ የተቀደሱት፣ ስሟን ሳይጠሩ በአክብሮት ይጠሩአት ነበር፣ በንግሥቲቱ ማዕረግ ብቻ ይጠሩአት ነበር። ለሀንጋሪ ንግሥት ስለዚህ ያችን ውድ አገር አደራ እንሰጣለን። ለሰላም ንግስት በአለም ላይ ድልድዮች እንዲገነቡ አደራ እንሰጣለን፣ በዚህ የትንሳኤ በዓል ወቅት ለምናደንቃት ለሰማይ ንግስት፣ ልባችንን በእግዚአብሔር ፍቅር ስር እንዲሰድ አደራ እንላለን።
