Papa: në Lindjen e Mesme një konflikt mizor, të hapen shtigje paqeje

R.SH. – Vatikan

Nga Sheshi Shën Pjetrit, në Vatikan, i zbukuruar me palma për të kujtuar hyrjen e Jezusit, Mbretit të Paqes, në Jeruzalem, mendimi i Papës Leoni XIV, përpara lutjes mariane të Engjëllit të Zotit, shkon tek të gjithë ata që nuk mund t’i kremtojnë Ritet e Javës së Shenjtë të Pashkëve, siç po ndodh në Tokën e Shenjtë për shkak të klimës së dhunës dhe kufizimeve të vendosura pikërisht nga lufta. Leoni XIV është pranë atyre që vuajnë “pasojat e një konflikti mizor” dhe bën thirrje për pajtim.

"Pikërisht ndërsa Kisha mediton mbi misterin e Mundimit të Krishtit Zot, nuk mund të harrojmë ata që sot marrin pjesë në mënyrë reale në vuajtjen e Tij. Sprova e tyre sfidon ndërgjegjen e të gjithëve. Të lartësojmë përgjërimin tonë drejt Princit të Paqes, që të mbështesë popujt e plagosur nga lufta dhe të hapë shtigje konkrete të pajtimit dhe të paqes."

Për jetën dhe për paqen

Papa nuk harron as viktimat e luftës, në veçanti detarët. Lutja e tij shkon edhe për të vdekurit, të lënduarit dhe familjet e tyre.

"Toka, qielli dhe deti janë krijuar për jetën dhe për paqen".

Lutja për emigrantët

Mes shumë “të kryqëzuarve” të sotëm – siç kujtoi Papa edhe në homelinë e Meshës së të Dielës së Larit (Dafinave) – nuk mungojnë emigrantët, njerëz të shtyrë nga ëndrra për një jetë të re, që mbyten në det. Ati i Shenjtë Leoni i referohet fatkeqësisë së fundit të ndodhur në brigjet e ishullit të Kretës, e cila shkaktoi 22 të vdekur. Sipas dëshmive të të mbijetuarve, trupat, pas gjashtë ditësh në mëshirë të fatit në bordin e një gomoneje, u hodhën në ujë, ndërsa 26 persona të tjerë, mes të cilëve një grua dhe një i mitur, u shpëtuan.

"Të lutemi për të gjithë emigrantët e vdekur në det, në veçanti për ata që humbën jetën ditët e fundit në brigjet e ishullit të Kretës".

Në fund, një përshëndetje e Papës për romakët dhe shtegtarët që morën pjesë në kremtimin në Sheshin Shën Pjetrit.