Papa: ligësia e korrupton historinë, po ne jemi të thirrur për të qenë lajmëtarë të së vërtetës
R.SH. / Vatikan
E vërteta, e errësuar nga lajmet e rreme e nga gënjeshtrat, del ende "e gjallë dhe e shkëlqyeshme". Jezusi është me të vërtetë "lajmi i mirë për t'iu dëshmuar botës"; një bote në të cilën e keqja "korrupton historinë dhe ngatërron ndërgjegjet". Papa Leoni XIV, gjatë lutjes marian Mbretëreshës Qiellore sot, më 6 prill, në Sheshin e Shën Pjetrit, në Vatikan, theksoi një nga lajmet tona më të dëshiruara e më prekëse: "kumtimi i Pashkëve e shpengon të ardhmen tonë nga varri".
Mendoj - vijoi Papa - për popujt e torturuar nga lufta, për të krishterët e persekutuar për fenë e tyre, për fëmijët e privuar nga shkolla. Të shpallësh Pashkët e Krishtit me fjalë e vepra, do të thotë t'i japësh zë të ri shpresës, përndryshe mbytet në duart e të dhunshmëve. Kur shpallet në mbarë botën, Lajmi i Mirë, ndriçon çdo hije, e në çdo kohë.
Rrëfimet e jetës e të vdekjes
Ungjilli i Mateut e udhëhoqi sot reflektimin e Papës, që kujtoi se si liturgjia, në këtë kohë Pashkësh, feston "hyrjen e të gjithë krijimit në kohën e shëlbimit! Dëshpërimi nga vdekja, pohoi, zhduket përgjithmonë, në emër të Krishtit". E më pas Papa u përqendrua në historinë e grave "që u takuan me të Ngjallurin" dhe historinë e rojeve që, të korruptuara nga krerët e Sinedrit, përhapin fjalët ugurzeza sipas të cilave trupi i Jezusit është vjedhur.
Nga e njëjta ngjarje, varri bosh, lindin dy interpretime: njëri është burimi i jetës së re dhe të amshuar, tjetri, i vdekjes së sigurt dhe përfundimtare.
Lajme të rreme
Dy variante që përplasen fort në thelbin e tyre më të thellë, të cilat Leoni i përdor si shembull për të na kujtuar rëndësinë e komunikimit të së vërtetës.
Ky kontrast na bën të reflektojmë mbi vlerën e dëshmisë së krishterë dhe ndershmërinë e komunikimit njerëzor. Thënia e së vërtetës shpesh errësohet nga "lajme të rreme", siç thohet sot - domethënë, nga gënjeshtra, aluzione, akuza të pabazuara.
E vërteta është përballë
"Përballë pengesave të tilla, shtoi Papa, e vërteta nuk mbetet e fshehur; përkundrazi, na pret, e gjallë dhe rrezatuese, duke ndriçuar errësirën më të dendur". Thotë kështu e në vijim kujton fjalët e Jezusit drejtuar grave - "Mos kini frikë! Shkoni e kumtoni" - fjalë, të cilat ende janë shumë të vlefshme edhe sot.
Ai vetë bëhet kështu lajmi i mirë për t’u dëshmuar në botë: Pashkët e Zotit janë Pashkët tona, Pashkët e njerëzimit, sepse ky njeri, që vdiq për ne, është Biri i Zotit, që e dha jetën e tij për ne. Ashtu si i Ngjalluri, gjithmonë i gjallë e i pranishëm, çliron të kaluarën nga një fund shkatërrues, ashtu edhe mesazhi i Pashkëve e shëlbon të ardhmen tonë nga varri.
E Papa uron që ky Ungjill t’i arrijë "të gjithë ata, që janë të shtypur nga i ligu e ligësia".
Kujtimi i Papës Françesku
Në përfundim të Mbretëreshës Qiellore, lutjes mariane që do të vazhdon deri në Solemnitetin e Rrëshajëve, Papa Leoni kujtoi, mes duartrokitjeve, Papën Françesku i cili më 21 prill 2025, të hënën e Pashkëve, ia dhuroi "jetën Zotit".
Ndërsa kujtojmë dëshminë e tij të madhe të fesë e të dashurisë, ta lusim së bashku Virgjërën Mari, Seli e Dijes, të bëhemi lajmëtarë gjithnjë e më të ndritshëm të së vërtetës.
